29 лістапада а 17-й гадзіне ў галерэі “Панарама” адбудзецца ўрачыстае адкрыццё выстаўкі фотамастака Аляксандра Ласмінскага “Пад небам Гродзеншчыны”.
На выстаўцы фатографа, журналіста, кіраўніка народнага фотаклуба “Гродна”, дырэктара тэлеканала “Гродна плюс” Аляксандра Ласмінскага прадстаўлена каля 50 пейзажаў незвычайнай прыгажосці, зробленых аўтарам з вышыні птушынага палёту.
Ідэя ўбачыць зямлю вачыма птушак з’явілася ў фотамастака ўжо даўно. Некалькі гадоў ён шукаў любую магчымасць падняцца ў неба над Гродзеншчынай, а сёння, маючы за плячыма больш за 20 палётаў, аўтар сапраўды можа ганарыцца сваім “паветраным” архівам, якога хопіць не на адну выстаўку. Абляцеўшы найбольш цікавыя куткі Гродзенскай вобласці і зафіксаваўшы фотакамерай непаўторныя пейзажы роднай зямлі, Ласмінскі адкрыў гледачу яе незвычайную прыгажосць і гармонію.
Уменне знаходзіць патрэбны ракурс, асцярожнае выкарыстанне палітры прыродных фарбаў, лаканічная кампазіцыя ў кожнай рабоце даюць права гаварыць пра аўтара як пра сапраўднага мастака, які сваёй выстаўкай уздымае фатаграфію да ўзроўню мастацкай каштоўнасці.
У рамках мерапрыемства адбудзецца прэзентацыя фотаальбома Аляксандра Ласмінскага “Гродзенская зямля з вышыні птушынага палёту”, выдадзенага ў 2011 г. тыражом 3 000 асобнікаў.
Выстаўка будзе доўжыцца да 10 студзеня 2012 г.
З 30 лістапада ўваход на выстаўку платны, складае кошт наведвання агляднай пляцоўкі.
Тэлефон для даведак: 293-27-67.
Е-mail: pr@nlb.by