У Нацыянальнай бібліятэцы знаходзіцца незвычайная калекцыя паштовак беларускага мастака Сяргея Давідовіча-Зосіна, на якіх намаляваны пажылыя людзі, што займаюцца спортам.
У якасці сувеніраў беларуская дэлегацыя брала іх з сабой на алімпіяды ў Пекіне, Лондане і Ванкуверы.
– Калі міністр спорту і турызму вярнуўся ў Беларусь, гаварыў: “Як мала я ўзяў! Трэба было больш браць”, – успамінае мастак.
На паштоўках сямейная пара за 60 з сельскай мясцовасці з запалам займаецца спортам: практыкуюцца ў каратэ, катаюцца на каньках, гуляюць у футбол, кідаюць мяшкі і займаюцца слаламам.
Упершыню паштоўкі былі надрукаваны трыма тыражамі па тысячы экзэмпляраў у 2003 годзе.
– Я іх напісаў, таму што мяне цікавіць жыццё ва ўсёй яго разнастайнасці. У маіх карцінах шмат бытавога, “звычайнага” гумару. З вялікай павагай стаўлюся да старых людзей, асабліва тых, хто жыве ў сельскай мясцовасці, – распавядае аўтар. – Я таксама чалавек з сялянскай сям’і і доўга жыў у вёсцы. Такіх людзей становіцца ўсё менш, за іх плячамі цяжкі жыццёвы шлях – вайна, голад. І гэтыя людзі, дзядулі і бабулі, не страцілі сваёй душы. Не змянілі адносіны да жыцця, захавалі гумар і рухавасць. У пенсіянераў часам больш аптымізму, чым у цяперашняга маладзейшага пакалення, – прыкмячае мастак.
Ідэі вобразаў мастак узяў з жыцця і змог іх абыграць у пазітыўным ключы.
– Жыццё шматграннае і цяжкае, – разважае Давідовіч-Зосін. – Чалавецтва на працягу стагоддзяў пераадольвае перашкоды, ставіць мэты. Чалавек пастаянна стварае. Калі думаць толькі пра зямное, то які ўнутраны свет будзе ў чалавека?
Дарэчы, Сяргей Фёдаравіч не толькі мастак, але і паэт. Работы падпісваў сам. А усяго ён выдаў 20 зборнікаў паэзіі.
– Ёсць выраз “у здаровым целе – здаровы дух”. Але я хачу паказаць адваротнае. Калі ў чалавека “здаровы дух”, у яго будзе здаровым і цела да старасці. Я перакананы, што здаровы гумар ратуе чалавека ад многіх глупстваў.
Аўтар публікацыі: Вольга Ярмольчык.
Крыніца: Tut.by