Паэма “La commedia” (1307–1321), вядомая нам як “Боская камедыя”, – манументальная эпічная праца, сапраўдная паэтычная энцыклапедыя эпохі ранняга Адраджэння. Гэта адзін з найбольш цікавых твораў італьянскага паэта Дантэ Аліг’еры, які прадстаўлены на выставе “«Боская камедыя» Дантэ”.
Кніга была надрукавана ў 1481 г. Міколам дэ Ларэнца ў Фларэнцыі і з’яўляецца адным з самых ранніх выданняў з гравюрамі на метале (медзярытамі), якія так і не сталі папулярнымі да сярэдзіны XVI ст. Гравюры ў “Камедыі” выкананы майстрам школы Бача Балдзіні, паводле малюнкаў знакамітага мастака Сандра Батычэлі.
У розных экзэмплярах выдання, што захаваліся ў свеце, налічваецца ад дзвюх да дваццаці медзярытаў. Першыя дзве гравюры “Дзева просіць Дантэ выбраць іншы шлях” надрукаваны разам з тэкстам, што адзначаецца ў асобніку, прадстаўленым на выставе. Астатнія выявы друкаваліся асобна і потым уклейваліся на падрыхтаванае месца – на жаль, у экзэмпляры Нацыянальнай бібліятэкі Беларусі гэтыя выяўленчыя матэрыялы адсутнічаюць. Але на пустых месцах засталіся сляды ад клею і прэса на аркушах [225] з раздзела “Чысцец” (Purgatorio), а таксама на [331] з раздзела “Рай” (Paradiso), што дае нам падставы выказаць меркаванне аб магчымай наяўнасці гравюр на гэтых месцах у мінулым.
Пераплёт кнігі XVI ст. выкананы на высокім узроўні. Дошкі абцягнуты скурай са сляпым рамачным цісненнем ролем i аздоблены ўзорнымі філетамі, а таксама ціснёным золатам суперэкслібрысам. На спінцы кнігі выканана сляпое цiсненне штампам.
Кніга мае шэраг мастацкіх і ўладальніцкіх знакаў. На пустым лісце перад тэкстам чарнілам ад рукі прапісаны даныя экзэмпляра, а ў верхнім правым кутку той жа рукапісны тэкст: “Ex libris… mann Hannoverae”. На адвароце верхняга форзаца прастаўлены дзве круглыя пячаткі з выявай герба і дрэнна адбiтым тэкстам: “Bundes Denkmalamt Wien”.
Геніяльнасць “Боскай камедыі” Дантэ Аліг’еры абсалютна бясспрэчная. Паэт упершыню ўявіў тое, што еўрапейская антычнасць разумела зусім інакш, а Сярэднявечча не краналася ўвогуле: паказаў вобраз чалавека. Гэта падкрэслівае знакавасць паэмы ў гісторыі сусветнай літаратуры і філасофіі. Акрамя таго, твор займае пэўнае месца ў гісторыі мастацтваў – мноства таленавітых мастакоў звярталася да яго ілюстравання.
Выстава “«Боская камедыя» Дантэ” будзе працаваць у музеі кнігі да 16 студзеня 2022 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.