2020 год у СНД аб’яўлены Годам 75-годдзя Перамогі ў Вялікай Айчыннай вайне 1941–1945 гадоў. На працягу тэматычнага Года ўжо адбыліся і яшчэ пройдуць шматлікія мерапрыемствы, у тым ліку пры ўдзеле бібліятэк.
На XXII Агульным сходзе членаў Бібліятэчнай асамблеі Еўразіі ў Нацыянальнай бібліятэцы Кыргызскай Рэспублікі імя А. Асмонава (17 мая 2019 г., г. Бішкек) было прынята рашэнне аб стварэнні дакументальнага фільма, прысвечанага дзейнасці бібліятэк СССР падчас Вялікай Айчыннай вайны.
Мэта фільма – сабраць, арганізаваць і прадставіць раней невядомыя матэрыялы, звязаныя з дзейнасцю цэнтральных рэспубліканскіх бібліятэк былых савецкіх рэспублік у перыяд 1941–1945 гг. Каардынатарамі праекту выступілі Прэзідэнцкая бібліятэка імя Б.М. Ельцына, Бібліятэчная асамблея Еўразіі пры ўдзеле бібліятэк краін Садружнасці.
Спецыяльна для фільма пра лёс Нацыянальнай бібліятэкі Беларусі ў час Вялікай Айчыннай вайны распавёў генеральны дырэктар Нацыянальнай бібліятэкі Беларусі Раман Матульскі. Ваенныя дзеянні і акупацыйны рэжым фактычна знішчылі галоўную бібліятэку Беларускай ССР. Найбольш цяжкай стратай стала згуба калекцыі 800-тысячнага фонду нацыянальных дакументаў, з якога ацалела толькі 34 тыс. экз.
Прэзентацыя фільма “Бібліятэчны фронт: 1941–1945 гг.” адбудзецца 27 мая на YouTube-канале Прэзідэнцкай бібліятэкі.
З трэйлерам фільма пазнаёміцца можна ўжо сёння:
Матэрыял падрыхтаваны аддзелам сувязей з грамадскасцю.
Пра лёс бібліятэк у гады вайны чытайце ў манаграфіі Р.С. Матульскага «Из прошлого в будущее. Библиотеки Беларуси».
