Віртуальная чытальная зала Нацыянальнай бібліятэкі Беларусі працягвае знаёміць аматараў гісторыі і падарожжаў з краязнаўчымі рэсурсамі, створанымі бібліятэкамі нашай краіны.
У рамках Года малой радзімы прадстаўляем цікавы электронны рэсурс Цэнтралізаванай бібліятэчнай сістэмы г. Гродна – “Гродна – інфармацыя для ўсіх”, прысвечаны аднаму з самых прыгожых гарадоў нашай краіны.
Гэта ўнікальная краязнаўчая калекцыя ўключае разнастайныя віды дакументаў: рукапісы, тэксты артыкулаў з перыядычных выданняў, фрагменты кніг, рэдкія фатаграфіі, відэасюжэты аб гісторыка-культурнай спадчыне Гродна, яго знакамітых жыхарах, турыстычных аб’ектах. Многія матэрыялы для праекта, прысвечанага роднаму гораду, прадстаўлены з асабістых архіваў самімі аўтарамі, вядомымі краязнаўцамі або членамі іх сем’яў.
Зручны і зразумелы пошукавы інтэрфейс дапамагае хутка знайсці патрэбныя бібліяграфічныя даныя (апісанні і анатацыі), а пасля знаёмства з імі – скачаць тэксты, аўдыя- і відэазапісы ці выявы.
Багаты кантэнт знаёміць з горадам у розныя перыяды яго гісторыі і ва ўсёй разнастайнасці яго развіцця – эканамічнага, ваеннага, палітычнага, культурнага, літаратурнага, архітэктурнага. Адкрываючы невядомыя старонкі гісторыі, можна даведацца, чаму Гродна праславіўся як горад каралёў, адыграўшы важную ролю ў вырашэнні лёсаў найбуйнейшых еўрапейскіх дзяржаў. Краязнаўчы рэсурс дазваляе адчуць не толькі дыханне мінулых стагоддзяў, але і рытм сённяшняга дня.
Здзяйсняючы займальнае і пазнавальнае віртуальнае падарожжа, несумненна, адчуваеш непераадольнае жаданне наведаць Гродна наяве, каб прайсціся па брукаванцы старога горада, дакрануцца да сцен старажытных касцёлаў і замкаў, захапіцца панарамай сярэдневяковых і сучасных будынкаў, выгібамі ракі Нёман, адчуць непаўторны каларыт горада-музея, які захоўвае памяць многіх пакаленняў сваіх жыхароў і ў той жа час актыўна накіраваны ў будучыню.