19 студзеня ў будынку Прэзідыума Нацыянальнай акадэміі навук Беларусі адбылася нарада па пытаннях навукова-вытворчага супрацоўніцтва ў галіне сацыякультурнага развіцця беларускага грамадства.
У нарадзе, якая ладзілася ў сувязі з зацвярджэннем дзяржаўнай праграмы “Культура Беларусі” на 2011–2015 гг., узялі ўдзел прадстаўнікі кіраўнічага саставу Аддзялення гуманітарных навук і мастацтваў НАН Беларусі, Беларускага дзяржаўнага ўніверсітэта культуры і мастацтваў і Нацыянальнай бібліятэкі Беларусі.
Значнасць гэтага мерапрыемства была падкрэслена галоўным вучоным сакратаром НАН Беларусі С.А. Чыжыкам, старшынёй нарады. Яго сустаршыня – акадэмік-сакратар Аддзялення гуманітарных навук і мастацтваў НАН Беларусі А.А. Каваленя – абазначыў асноўныя напрамкі сумеснай працы ўстаноў навукі, адукацыі і культуры ў галіне вывучэння і папулярызацыі дасягненняў айчыннай культуры, а таксама інфармацыйнага забеспячэння інавацыйнага развіцця беларускага грамадства.
Аддзяленне гуманітарных навук і мастацтваў НАН Беларусі, створанае ў 1936 г. як Аддзяленне грамадскіх навук Акадэміі навук БССР, выконвае і каардынуе комплекс навуковых даследаванняў у розных галінах сацыяльных і гуманітарных навук. У склад аддзялення ўваходзяць 6 дзяржаўных навуковых устаноў: інстытуты філасофіі; эканомікі; сацыялогіі; гісторыі; мастацтвазнаўства, этнаграфіі і фальклору; мовы і літаратуры, а таксама Цэнтральная навуковая бібліятэка імя Якуба Коласа і Выдавецкі дом “Беларуская навука”.
Прадстаўнікі Нацыянальнай бібліятэкі Беларусі (прагучалі даклады дырэктара Р.С. Матульскага, намеснікаў дырэктара Л.Г. Кірухінай і Т.У. Кузьмініч, вучонага сакратара А.А. Сушы) выступілі з канкрэтнымі прапановамі па ўзаемадзеянні пры рэалізацыі дзяржаўнай праграмы “Культура Беларусі” на 2011–2015 гг. і Нацыянальнай праграмы паскоранага развіцця паслуг у галіне інфармацыйных тэхналогій на 2011–2015 гг., асобных навуковых і выдавецкіх праектаў.
Па выніках нарады ўсімі ўдзельнікамі была падтрымана ініцыятыва больш цеснага супрацоўніцтва ў галіне сацыякультурных навуковых даследаванняў і праектаў па папулярызацыі нацыянальнай кніжнай спадчыны. Было прынята рашэнне аб каардынацыі планаў навукова-даследчай работы паміж установамі навукі, адукацыі і культуры, аператыўнай распрацоўцы прапаноў па сумесным ажыццяўленні навуковых праектаў і стварэнні міжведамасных навуковых калектываў па іх рэалізацыі.
Прызнаючы надзвычай карыснымі вынікі праведзенай нарады, якія сведчаць пра пад'ём супрацоўніцтва ў галіне сацыягуманітарных даследаванняў на якасна новы ўзровень, удзельнікі выказалі гатоўнасць да правядзення падобных кардынацыйных пасяджэнняў у пашыраным складзе як на базе ўстаноў НАН Беларусі, так і ва ўстановах культуры і адукацыі.