“Наваполацк – культурная сталіца Беларусі 2018 года” – новы блок інфармацыі аб адным з самых маладых гарадоў краіны, які сёлета адзначае свой 60-гадовы юбілей.
Наваполацк – буйны прамысловы цэнтр Рэспублікі Беларусь, у якім існуе багатая сацыяльная і культурная інфраструктура: 10 дзяржаўных устаноў культуры, больш за 35 мастацкіх калектываў рознай жанравай накіраванасці, якія маюць статус “заслужанага”, “народнага” і “ўзорнага”.
Штогод у горадзе праводзіцца звыш 3-х тысяч розных мерапрыемстваў. Многія з іх ужо сталі брэндавымі. У 2011 г. Наваполацк першым у Беларусі ўдастоены ганаровага звання “Горад, дружалюбны дзецям”. Па выніках 2016 г. населены пункт стаў пераможцам у рэспубліканскім конкурсе “Горад культуры ў Год культуры”.
Гэтыя і іншыя цікавыя фактычныя звесткі змешчаны ў 3-м нумары вядомага ў нашай краіне і за яе межамі бюлетэня “Новыя кнігі: па старонках беларускага друку”. Навукова-даследчым аддзелам бібліяграфіі Нацыянальнай бібліятэкі Беларусі на падставе аналізу айчыннай выдавецкай прадукцыі за апошнія 10 гадоў падрыхтаваны бібліяграфічны матэрыял, што дае ўяўленне аб гісторыі, сацыяльна-эканамічным развіцці, архітэктурных асаблівасцях, багатай культурнай спадчыне горада. Выданне адрасавана бібліятэчным работнікам, выкладчыкам, настаўнікам, студэнтам, экскурсаводам, а таксама будзе карысна ўсім, хто цікавіцца гісторыяй беларускіх гарадоў.