У перыяд самых радасных і чаканых свят – Новага года і Каляд – здзяйсняюцца запаветныя жаданні і мары. 17 снежня ў бібліятэцы адбылася экскурсія для дзяцей-сірот з дзіцячых дамоў сямейнага тыпу.
Пра наведванне Нацыянальнай бібліятэкі марылі дзеці з сем’яў Гаўрычэнка і Куліковых. Менавіта пра такое жаданне напісалі яны ў сваіх лістах Дзеду Марозу.
Супрацоўнікі аддзела экскурсійна-метадычнай работы падрыхтавалі для хлопчыкаў і дзяўчынак сюрпрыз. Экскурсію з наведваннем музея кнігі і агляднай пляцоўкі для іх правяла… Снягурка. Экскурсійная праграма прадугледжвала не толькі знаёмства з бібліятэкай, але і выкананне заданняў, якія дзеткам прапанавала ўнучка Дзеда Мароза.
Падчас экскурсіі госці пазнаёміліся з архітэктурнымі асаблівасцямі бібліятэкі, работай чытальных залаў, сістэмай дастаўкі дакументаў. З цікавасцю дзяўчынкі і хлопчыкі разглядалі мастацкія пано і карціны ў кальцавых калідорах, якія ствараюць непаўторнае аблічча галоўнага кнігасховішча краіны. У музеі кнігі дзеці пазнаёміліся з рэдкімі кнігамі, рукапісамі, выданнямі Францыска Скарыны пражскага перыяду.
На агляднай пляцоўцы чакаў яшчэ адзін навагодні сюрпрыз: юных гасцей вітаў сам Дзед Мароз. І, канечне ж, дзеці атрымалі ад яго падарункі – цукеркі і паветраныя шары. Скончылася экскурсія аглядам панарамы горада.
 |
 |
 |
 |
|
 |
