4–6 кастрычніка ў чацвёрты раз у Рэспубліцы Беларусь адбыўся нацыянальны форум “Музеі Беларусі”. Прадстаўнікі музейнай супольнасці краіны, а таксама госці з-за мяжы сабраліся разам у Брэсце, каб абмеркаваць актуальныя пытанні музейнай дзейнасці, вызначыць тэндэнцыі яе развіцця і прадэманстраваць свае дасягненні.
Арганізацыйны камітэт выбірае тэму форуму, якая задае напрамак усяму мерапрыемству. Сёлета тэма гучала як “Музей: навука, інавацыя, камунікацыя”. У рамках экспазіцыі форуму ўдзельнікі прадставілі свае калекцыі, культурна-адукацыйныя і экспазіцыйна-выставачныя праекты, прадэманстравалі новыя формы работы з наведвальнікамі і прымяненне новых тэхналогій. У дэманстрацыйнай праграме адбыліся інтэрактыўнае, тэатралізаванае і віртуальнае прадстаўленне ўдзельнікамі форуму сваіх устаноў. У дзелавой праграме вядучымі навукоўцамі-музеёлагамі і музейнымі спецыялістамі былі прэзентаваны актуальныя даследаванні ў сферах музейнай дзейнасці.
У рамках дзелавой праграмы форуму з дакладам “Практыка самапазіцыянавання музеяў і бібліятэк (на прыкладзе комплексу мерапрыемстваў па вяртанні і аднаўленні Брэсцкай Бібліі)” выступіў намеснік дырэктара Нацыянальнай бібліятэкі Беларусі Аляксандр Суша.
Асноўныя мэты нацыянальнага форуму “Музеі Беларусі” – гэта прадстаўленне беларускіх музеяў і іх дзейнасці, папулярызацыя інавацыйных падыходаў і сучасных інфармацыйных тэхналогій у музейнай справе, кансалідацыя музейнай супольнасці, павышэнне прафесійнага майстэрства ўдзельнікаў форуму, пашырэнне партнёрства паміж музеямі і арганізацыямі з іншых абласцей прафесійнай дзейнасці, развіццё і ўмацаванне міжнародных культурных сувязей.
Матэрыял прадастаўлены навукова-даследчым аддзелам кнігазнаўства.