27 верасня ў Рэспубліцы Азербайджан адбылося ўрачыстае адкрыццё VI Бакінскай міжнароднай кніжнай выстаўкі-кірмашу (МКВК), прысвечанай 650-годдзю азербайджанскага паэта Імадэддзіна Насімі.
У адкрыцці прынялі ўдзел грамадскія дзеячы, прадстаўнікі навукі, літаратуры, культуры, мастацтва, а таксама дыпламатычных місій, акрэдытаваных у краіне, і замежныя госці.
Нацыянальную бібліятэку Беларусі на VI Бакінскай МКВК прадставіла першы намеснік дырэктара па абслугоўванні карыстальнікаў і ідэалогіі Алена Далгаполава.
У рамках выстаўкі-кірмашу 27–28 верасня ў канферэнц-зале Нацыянальнай бібліятэкі Азербайджана імя М.Ф. Ахундава прайшла міжнародная навукова-практычная канферэнцыя “Бібліятэкі як мабільныя інфармацыйныя цэнтры”, на якой Алена Ерамееўна выступіла з дакладам “Бібліятэчны сэрвіс у сетцы Інтэрнэт: пра некаторыя праекты Нацыянальнай бібліятэкі Беларусі”.
У Азербайджанскай нацыянальнай бібліятэцы таксама адбылося адкрыццё Залы міжнароднага супрацоўніцтва. У адкрыцці прынялі ўдзел супрацоўнікі дыпламатычных прадстаўніцтваў 13 краін у Азербайджане і кіраўнікі бібліятэк.
Нацыянальная бібліятэка Беларусі прадставіла экспазіцыю кніг беларускіх выдавецтваў, якая адлюстроўвае сацыяльна-эканамічнае развіццё краіны, яе шматвяковую гісторыю і багатую культуру. Беларускі стэнд наведалі віцэ-прэзідэнт Фонду Гейдара Аліева Лэйла Аліева, Надзвычайны і Паўнамоцны Пасол Рэспублікі Беларусь у Азербайджанскай Рэспубліцы Генадзь Ахрамовіч. Цяпер у Нацыянальнай бібліятэцы Азербайджана заўсёды будзе прадстаўлена літаратура пра Беларусь.
29 верасня для замежных гасцей прадугледжана культурная праграма з наведваннем Нацыянальнага музея дывана і Нацыянальнага музея мастацтваў.
Матэрыял прадстаўлены аддзелам сувязей з грамадскасцю.
