6 лютага адкрыўся самы маштабны фестываль у беларускай кніжнай індустрыі – ХХVI Мінская міжнародная кніжная выстаўка-кірмаш.
Самы маштабны беларускі фестываль кнігі для Нацыянальнай бібліятэкі пачаўся з асабліва прыемнай падзеі – ва ўрачыстай абстаноўцы лаўрэат прэміі Прэзідэнта Рэспублікі Беларусь “За духоўнае адраджэнне” Уладзімір Ліхадзедаў перадаў рэдкія выданні і рукапісы з уласнай калекцыі ў фонд “алмаза ведаў”.
Сярод іх – кірылічныя і заходнееўрапейскія старадрукі беларускай тэматыкі, картаграфічныя матэрыялы, “спавядальныя ведамасці” і “шлюбныя вобыскі” Праваслаўнай царквы (XIX ст.), дакументы аб шляхецкім паходжанні. Таксама перададзены рукапіс беларускіх татараў, арыгінальны прывілей Жыгімонта III Вазы (пачатак XVII ст.) на старабеларускай мове з калекцыі Тышкевіча, полацкі дакумент (XVI ст.), падшыўка Гродзенскіх губернскіх ведамасцей 1840-х гг. і інш.
Гэтыя кнігі, часопісы і архіўныя матэрыялы дэманструюцца на стэндзе Міністэрства інфармацыі Рэспублікі Беларусь у экспазіцыі “У пошуках страчанага”.
Традыцыйна да міжнароднай выстаўкі-кірмашу Нацыянальная бібліятэка Беларусі падрыхтавала насычаную праграму. У першы дзень прайшла прэзентацыя факсімільнага выдання першай у свеце кнігі пад назвай “Буквар” (Еўе, 1618).
Намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша павіншаваў прысутных з адкрыццём выстаўкі-кірмашу і распавёў пра значэнне “Буквара” для кніжнай культуры беларускага народа.
Факсімільнае перавыданне 400-гадовага “Буквара” для Нацыянальнай бібліятэкі стала галоўным праектам мінулага года. На ММКВК прайшла цырымонія ўручэння асобнікаў выдання. Шчаслівымі ўладальнікамі сталі кандыдат педагагічных навук, дацэнт, аўтар сучаснага буквара Вольга Цірынава, дэкан факультэта пачатковай адукацыі Беларускага дзяржаўнага педагагічнага ўніверсітэта імя М. Танка Наталля Ждановіч, вучні гімназіі № 4 г. Мінска і лепшыя педагогі пачатковай школы Рэспублікі Беларусь.
На дзіцячай пляцоўцы міжнароднай выстаўкі-кірмашу для маленькіх чытачоў часопіса “Вясёлка” сумесна з Нацыянальнай бібліятэкай Беларусі прайшла інтэрактыўная гульня “Буквар. Таямніцы 4-х стагоддзяў”. Аўтарам аднайменнага праекта выступіў Аляксандр Суша. На працягу мінулага года ў выпусках часопіса “Вясёлка” публікаваліся загадкі і гульні, якія знаёмяць маленькіх чытачоў з букварамі розных часоў.
З дня адкрыцця і да завяршэння кніжнага фестывалю на стэндзе Нацыянальнай бібліятэкі можна азнаёміцца з экспазіцыяй “Беларускі буквар: чатыры стагоддзі гісторыі”, якая распавядае, якімі былі дапаможнікі для пачатковага навучання грамаце ў розныя эпохі, пачынаючы з XVI стагоддзя па сённяшні час. Экспазіцыя прадстаўляе факсіміле 400-гадовага “Буквара” і яго “нашчадкаў”: буквар Спірыдона Собаля (Куцейна, 1631 г.), “Букварь языка славенскаго” (Вільня, 1767 г.), буквары Цёткі, Якуба Коласа, Каруся Каганца, Сцяпана Некрашэвіча, заходнебеларускія буквары, а таксама сучасныя, напісаныя залатым медалістам Лейпцыгскага кніжнага кірмашу Анатолем Клышкам.
Матэрыял прадастаўлены аддзелам сувязей з грамадскасцю.
