21 красавіка ў Расійскай дзяржаўнай бібліятэцы пачала сваю працу міжнародная навукова-практычная канферэнцыя “Румянцаўскія чытанні – 2021”, арганізаваная Расійскай дзяржаўнай бібліятэкай сумесна з Міністэрствам культуры Расійскай Федэрацыі і некамерцыйным партнёрствам “Бібліятэчная асамблея Еўразіі”.
На канферэнцыі традыцыйна разглядаюцца пытанні захавання і вывучэння сусветнай культурнай спадчыны, праблемы функцыянавання бібліятэк на сучасным этапе і пошук перспектыўных шляхоў развіцця, пашырэнне міжкультурнага ўзаемадзеяння і супрацоўніцтва паміж установамі культуры, адукацыі і навукі.
Гасцей канферэнцыі віталі Аляксандр Самарын, намеснік генеральнага дырэктара па навукова-выдавецкай дзейнасці Расійскай дзяржаўнай бібліятэкі, Міхаіл Афанасьеў, прэзідэнт Расійскай бібліятэчнай асацыяцыі, і Раман Матульскі, генеральны дырэктар Нацыянальнай бібліятэкі Беларусі і прэзідэнт некамерцыйнага партнёрства “Бібліятэчная асамблея Еўразіі”. У сваім відэазвароце Раман Сцяпанавіч акцэнтаваў увагу на культурна-гістарычнай блізкасці Расіі і Беларусі, адзначыўшы, што дзейнасць графа Румянцава з’яўляецца “яскравым прыкладам узаемапранікнення і ўзаемаразвіцця дзвюх культур”.
У пленарным пасяджэнні ўзялі ўдзел спецыялісты Расійскай дзяржаўнай бібліятэкі, Расійскай нацыянальнай бібліятэкі, Нацыянальнай бібліятэкі Беларусі і Нацыянальнай бібліятэкі Кыргызскай Рэспублікі імя А. Асмонава. Абмяркоўваліся праблемы алічбоўкі і прадстаўлення доступу да кніжных помнікаў, навукова-даследчая дзейнасць бібліятэк, а таксама праца бібліятэк у перыяд пандэміі. Нашу бібліятэку прадстаўляў Аляксандр Суша, намеснік генеральнага дырэктара – дырэктар па навуковай рабоце і выдавецкай дзейнасці. У сваім выступленні Аляксандр Аляксандравіч распавёў пра досвед Нацыянальнай бібліятэкі ў стварэнні Дзяржаўнага рэестра кніжных помнікаў Беларусі – ключавога Нацыянальнага рэсурсу, які забяспечвае ўлік, захаванасць, апісанне і сістэматызацыю звестак аб кніжных помніках краіны.
Канферэнцыя пройдзе 21–23 красавіка ў афлайн- і анлайн-рэжымах. З раскладам трансляцый можна азнаёміцца на сайце Расійскай дзяржаўнай бібліятэкі.
Матэрыял пададзены аддзелам сувязей з грамадскасцю.
