14 снежня на платформе Zoom прайшоў круглы стол “Адукацыйныя праекты ў лічбавым асяроддзі: партнёрства школ і бібліятэк” (да 75-годдзя Вялікай Перамогі).
Удзел у ім прынялі спецыялісты Усерасійскай дзяржаўнай бібліятэкі замежнай літаратуры імя М.І. Рудаміно, Нацыянальнай бібліятэкі Беларусі, Гомельскай абласной універсальнай бібліятэкі імя У.І. Леніна, выкладчыкі гісторыі, настаўнікі.
З прывітальным словам да ўдзельнікаў дыстанцыйнага круглага стала звярнуўся генеральны дырэктар Нацыянальнай бібліятэкі Беларусі Раман Матульскі. “У бягучым годзе бібліятэкамі нашых краін асаблівая ўвага надавалася сумеснай працы па падрыхтоўцы да святкавання 75-годдзя Перамогі ў Вялікай Айчыннай вайне. Было падрыхтавана нямала праектаў, але не ўсе яны з прычыны сітуацыі, якая склалася, былі рэалізаваны, як гэтага хацелася”, – адзначыў генеральны дырэктар. Раман Сцяпанавіч падзякаваў калегам за выдатную магчымасць сустрэцца віртуальна і абмеркаваць важную для дзвюх краін тэму партнёрства школ і бібліятэк.
Вопытам стварэння віртуальных праектаў падзялілася загадчыца аддзела суправаджэння інтэрнэт-партала Нацыянальнай бібліятэкі Беларусі Юлія Кісялёва. Юлія Алегаўна распавяла аб інтэрнэт-праекце “Падпольны і партызанскі друк Беларусі”, які быў рэалізаваны на сродкі гранта Прэзідэнта Рэспублікі Беларусь у галіне культуры. Сайт пастаянна папаўняецца і цяпер налічвае 100 найменняў газет, больш за тысячу іх выпускаў, прыкладна 150 лістовак і рукапісных матэрыялаў.
Круглы стол прайшоў у рамках праекта “Бібліятэкі – сведкі агульнай Перамогі”. Гэта міжнародны рэсурс адкрытага доступу падрыхтаваны да знакавай даты Усерасійскай дзяржаўнай бібліятэкай замежнай літаратуры імя М.І. Рудаміно ў супрацоўніцтве з бібліятэкамі-партнёрамі краін Садружнасці Незалежных Дзяржаў.
Азнаёміцца з прадстаўленымі Нацыянальнай бібліятэкай Беларусі кейсамі для сайта можна па спасылцы.
Матэрыял пададзены аддзелам сувязей з грамадскасцю.
