17 мая ў Бішкеку, Кыргызская Рэспубліка, працягнула сваю работу міжнародная канферэнцыя “Кніга і чытанне ў лічбавую эпоху”.
Дырэктар Нацыянальнай бібліятэкі Беларусі Раман Матульскі наведаў студыю Кыргызскага тэлеканала, дзе ў прамым эфіры ранішняй перадачы расказаў пра актуальнасць праблемы чытання для ўсіх краін, уключаючы ўсе дзяржавы – удзельніцы Садружнасці Незалежных Дзяржаў. Па словах Рамана Сцяпанавіча, далучэнне да чытання з’яўляецца важнай умовай фарміравання новага пакалення грамадзян. Сёння неабходна павышаць і ўмацоўваць у грамадскай свядомасці важнасць праблемы падтрымкі і развіцця чытання. Таксама дырэктар падзяліўся сваімі ўражаннямі аб міжнароднай канферэнцыі, адзначыўшы высокі ўзровень арганізацыі навуковага форуму.
У гэты ж дзень адбылося адкрыццё ўрачыстага мерапрыемства, прысвечанага 85-годдзю Нацыянальнай бібліятэкі Кыргызскай Рэспублікі імя Алыкула Асмонава і ХІ Форуму бібліятэчных работнікаў Кыргызстана на тэму “Стратэгія развіцця бібліятэк Кыргызстана ў лічбавую эпоху”.
Раман Сцяпанавіч павіншаваў калег з юбілеем, пажадаўшы бібліятэцы росквіту, пастаяннай увагі і любові чытачоў, а яе супрацоўнікам – здароўя, шчасця і дабрабыту. У якасці падарунка бібліятэцы было паднесена факсімільнае ўзнаўленне першай у свеце кнігі пад назвай “Буквар” (1618), закліканае спрыяць папулярызацыі лепшых узораў кніжнай культуры беларускага народа, захаванню яго духоўнай спадчыны.
У бібліятэцы-юбіляры 17 мая адбылося XXII Агульны сход членаў Бібліятэчнай асамблеі Еўразіі (БАЕ). Тэма пасяджэння 2019 г. – “Нацыянальныя бібліятэкі Садружнасці Незалежных Дзяржаў: кніга і чытанне ў жыцці лічбавага пакалення”.
З прывітальным словам выступілі Аляксандр Віслы, прэзідэнт БАЕ, намеснік генеральнага дырэктара Расійскай дзяржаўнай бібліятэкі, і Жылдыз Бакашова, дырэктар Нацыянальнай бібліятэкі Кыргызскай Рэспублікі імя Алыкула Асмонава. У пасяджэнні прыняў удзел віцэ-прэзідэнт БАЕ Раман Матульскі.
Дырэктары і вядучыя спецыялісты найбуйнейшых бібліятэк Садружнасці змаглі абмеркаваць з калегамі дзейнасць арганізацыі ў 2018 годзе, бягучыя праекты асамблеі, пытанні ўзаемадзеяння бібліятэк – удзельніц БАЕ па папулярызацыі нацыянальных культур краін СНД і шэраг ініцыятыў у рамках святкавання 75-годдзя Перамогі ў Вялікай Айчыннай вайне 1941–1945 гадоў.
Матэрыял прадастаўлены аддзелам сувязей з грамадскасцю.