15–17 лістапада ў Расійскай Федэрацыі праходзіць VII Санкт-Пецярбургскі міжнародны культурны форум, у мерапрыемствах якога прымае ўдзел дырэктар Нацыянальнай бібліятэкі Беларусі Раман Матульскі.
Форум праводзіцца штогод з 2012 года і прызнаны культурнай падзеяй сусветнага ўзроўню. З'яўляючыся адной з найбольш аўтарытэтных пляцовак, форум і сёлета сабраў тысячы экспертаў у галіне культуры з усяго свету. Зоркі тэатра, оперы і балета, выбітныя рэжысёры і музыкі, грамадскія дзеячы, прадстаўнікі ўлады і бізнесу, акадэмічнай супольнасці сустрэліся для абмеркавання шырокага кола пытанняў развіцця культуры і мастацтва.
15 лістапада ў Прэзідэнцкай бібліятэцы імя Б.М. Ельцына адбылося галоўнае мерапрыемства секцыі “Літаратура і чытанне” – пленарнае паседжанне “Чытанне ў лічбавую эпоху”. Раман Матульскі прыняў удзел у дыскусіі, абмеркаваўшы з замежнымі калегамі важныя пытанні трансфармацыі працэсу чытання, развіцця электронных кніжных праектаў, павышэння ролі кнігі і чытання ў лічбавай прасторы.
У гэты ж дзень дырэктар Нацыянальнай бібліятэкі Беларусі выступіў у якасці мадэратара на сімпозіуме “Інфармацыя. Грамадства. Развіццё: міжнародныя сувязі бібліятэк”, адкрыццё якога адбылося ў галоўным будынку Расійскай нацыянальнай бібліятэкі. Раман Матульскі падзяліўся з замежнымі калегамі вопытам міжнароднага супрацоўніцтва нашага “алмаза ведаў” па захаванні гісторыка-культурнай спадчыны на прыкладзе праекта па факсімільным выданні першага беларускага “Буквара” (1618).
Матэрыял падрыхтаваны аддзелам сувязей з грамадскасцю.