Да 75-годдзя Вялікай Перамогі 3 ліпеня 2020 года ў Пензенскай абласной бібліятэцы імя М. Ю. Лермантава ў фармаце анлайн адбыўся XII Міжрэгіянальны круглы стол “Метадычная служба рэгіянальных бібліятэк у сучасных умовах”, удзел у якім Нацыянальная бібліятэка Беларусі прыняла ўпершыню.
Генеральны дырэктар Раман Матульскі выступіў з прывітальным словам і падкрэсліў актуальнасць тэмы круглага стала: “Прайшла велізарная колькасць часу па чалавечых мерках, але памяць пра тыя дні, калі мы былі разам, калі разам змагаліся супраць ворага, які хацеў адабраць у нас будучыню, застанецца назаўсёды. І немалаважная роля належыць у гэтай справе нам, бібліятэкарам, каб захаваць памяць пра тыя дні, захоўваючы матэрыялы, якія сапраўды адлюстроўваюць гераічны подзвіг нашага народа”.
Загадчыца аддзела галерэйна-выставачнай дзейнасці Ірына Васільковіч распавяла пра галоўныя выставачныя праекты, рэалізаваныя Нацыянальнай бібліятэкай Беларусі да 75-годдзя Вялікай Перамогі: перасоўную выставу “Лясная песня”, гісторыка-дакументальную “Шлях да Перамогі: гістарычныя крыніцы сведчаць”, выставу графікі “Полымя ваенных дзён”, культурна-гістарычны праект “Вайна і мір. Беларусь памятае. Вяртанне”.
Асаблівая ўвага ў выступленні была нададзена самаму маштабнаму выставачнаму праекту бібліятэкі – “Вялікая Перамога”.
“Маштабнасць праекта вызначаецца і колькасцю суарганізатараў – іх 5, і колькасцю экспанатаў – іх 500, і займаемай плошчай – каля 300 м2. Аб’яднанне музейных прадметаў, архіўных дакументаў, друкаваных выданняў і відэаматэрыялаў дае наведвальніку аб’ёмнасць і шматмернасць успрымання тэмы Вялікай Айчыннай вайны.
Праект спрыяе захаванню гістарычнай памяці аб Вялікай Айчыннай вайне 1941–1945 гадоў дзякуючы суперажыванню і глыбокаму разуменню падзей ваеннага часу”.
Пазнаёміцца з фрагментамі выставы можна, паглядзеўшы наш відэаролік.
Анлайн-удзельнікі пасяджэння змаглі пазнаёміцца не толькі з вопытам Нацыянальнай бібліятэкі Беларусі, але і бібліятэк Масквы, Санкт-Пецярбурга, Разані, Ульянаўска, Самары, Тамбова і іншых гарадоў Расіі; прагучала шмат інавацыйных ідэй і арыгінальных праектаў бібліятэк па захаванні памяці пра Вялікую Айчынную вайну.
Праслухаць выступленні ўдзельнікаў Міжрэгіянальнага круглага стала можна па спасылцы.
Матэрыял пададзены аддзелам сувязей з грамадскасцю.
