Штогадовая Генеральная канферэнцыя і асамблея Міжнароднай федэрацыі бібліятэчных асацыяцый і ўстаноў (ІФЛА) – галоўны бібліятэчны форум свету.
Арганізацыя ІФЛА была створана яшчэ ў 1927 годзе ў Эдынбургу, Шатландыя. Сёння яна налічвае 1 400 членаў з 140 краін і з’яўляецца вядучым міжнародным органам, які прадстаўляе інтарэсы бібліятэчных і інфармацыйных службаў, а таксама іх карыстальнікаў. Гэта глабальны голас у бібліятэчнай і інфармацыйнай сферы дзейнасці.
Месцам правядзення 85-й Генеральнай канферэнцыі ІФЛА ў 2019 г. абраны горад Афіны, Грэцыя. Сёлета пасяджэнні ІФЛА праходзяць з 24 па 30 жніўня. Тэма кангрэса – “Бібліятэкі: дыялогі для змен”. Традыцыйна маштабная падзея сабрала спецыялістаў з усяго свету для абмену досведам і ідэямі, абмеркавання новых інфармацыйных тэхналогій і дасягненняў у бібліятэчнай справе, устанаўлення прафесійных кантактаў і доўгатэрміновага супрацоўніцтва.
У мерапрыемствах канферэнцыі ІФЛА прымае ўдзел дырэктар Нацыянальнай бібліятэкі Беларусі Раман Матульскі.
27 жніўня ў Нацыянальнай бібліятэцы Грэцыі адбылося пасяджэнне дырэктараў нацыянальных бібліятэк (CDNL, Conference of Directors of National Libraries). На адкрыцці канферэнцыі з прывітальным словам перад прысутнымі выступілі старшыня CDNL Лілу Кнібелер, генеральны дырэктар Нацыянальнай бібліятэкі Нідэрландаў, і Філіп Цымпоглу, генеральны дырэктар Нацыянальнай бібліятэкі Грэцыі. У гэтым годзе канферэнцыя ўключае тэматычныя прэзентацыі і абмеркаванні ў групах. Падчас сустрэчы ўдзельнікі падзяліліся найбольш значнымі для нацыянальных бібліятэк праблемамі. Сумесная прэзентацыя аб дзейнасці Міжнароднай федэрацыі бібліятэчных асацыяцый была прадстаўлена прэзідэнтам ІФЛА Крысцін Макензі і генеральным сакратаром Джэральдам Ляйтнерам.
Падчас пасяджэння CDNL дырэктар “алмаза ведаў” Раман Матульскі перадаў у дар генеральнаму дырэктару Нацыянальнай бібліятэкі Грэцыі Філіпу Цымпоглу факсімільнае ўзнаўленне першай у свеце кнігі пад назвай “Буквар” (1618).
У наступныя дні Генеральная канферэнцыя і асамблея ІФЛА працягне сваю працу.
Матэрыял прадастаўлены аддзелам сувязей з грамадскасцю.
Чытайце таксама:
CIS Caucus: сустрэча дэлегатаў краін СНД на кангрэсе ІФЛА – 2019