12 жніўня 2009 года ў Нацыянальнай бібліятэцы Беларусі адбылася прэс-канферэнцыя, прысвечаная перадачы ЗП “Брытыш-Амерыкан Табака Трэйдынг Кампані” ў дарунак бібліятэцы калекцыі унікальных рукапісных і старадрукаваных кніг, беларускіх перыядычных выданняў, карт.
Мерапрыемства прайшло ў рамках дабрачыннай акцыі “Рарытэтныя выданні – беларускай скарбніцы”.
З вітальным словам да гасцей звярнуліся намеснік міністра культуры Рэспублікі Беларусь В.І. Кураш, старшыня Беларускага фонду культуры У.А. Гілеп і начальнік аддзела па карпаратыўных сувязях ЗП “Брытыш-Амерыкан Табака Трэйдынг Кампані” С.М. Буры.
Усяго перададзена ў дарунак 18 рэдкіх кніг, 3 карты і 3 перыядычныя выданні. Па меркаванні экспертаў, калекцыя з’яўляецца цэнным укладам у справу захавання дакументальнай спадчыны і ўяўляе цікавасць для даследчыкаў з прычыны сваёй несумненнай навуковай значнасці.
Асобае месца сярод перададзеных выданняў займаюць сем рукапісаў старажытнай традыцыі, якія былі створаны стараабрадцамі Беларусі ў XVIII–XIX стст. Гэта жыційныя, богаслужэбныя, пеўчыя славяна-рускія рукапісныя кнігі. У калекцыю таксама ўваходзяць унікальныя богаслужэбныя рукапісы крукавой натацыі 2-й чвэрці XIX ст. – Ірмалогій, Актоіх і Зборнік велікодных службаў. Усе падораныя рарытэты будуць даступны чытачам бібліятэкі ў зале рукапісаў, старадрукаваных і рэдкіх выданняў.
 |
 |
 |
 |
 |
 |
