З 31 кастрычніка ў межах міжнароднага праекта ”Францыск Скарына і яго эпоха” арганізавана выстаўка ”Натхнёныя словам Купалы”.
Арганізатары экспазіцыі, прысвечанай 135-годдзю з дня нараджэння класіка беларускай літаратуры і 500-годдзя беларускага кнігадрукавання, – Нацыянальная бібліятэка Беларусі і Дзяржаўны літаратурны музей Янкі Купалы.
Янка Купала (Іван Дамінікавіч Луцэвіч, 1882–1942) – зорка першай велічыні на беларускім паэтычным небасхіле. Яго творчая спадчына – істотная частка духоўнай культуры беларускага народа.
Прыгажосць паэтычнага слова Купалы не аднойчы натхняла мастакоў, работы якіх станавіліся ілюстрацыямі да яго выданняў, пераўтвараючы кнігі ў шэдэўры высокага мастацтва.
На выстаўцы прадстаўлены работы з залатога фонду беларускай кніжнай графікі ХХ ст. такіх выбітных мастакоў, як Арлен Кашкурэвіч, Васіль Шаранговіч, Міхаіл Басалыга. У тэхніцы лінагравюры і літаграфіі выкананы творы Арлена Кашкурэвіча, якія аздобілі выданні знакамітай паэмы Янкі Купалы ”Курган” на трох мовах і збор твораў Янкі Купалы і Якуба Коласа з серыі ”Библиотека всемирной литературы”. Класікай беларускай графікі сталі лінагравюры Васіля Шаранговіча па матывах паэм Янкі Купалы ”Курган”, ”Бандароўна”, ”Магіла льва” і каляровыя лінагравюры і афорты Міхаіла Басалыгі.
На выстаўцы размешчаны таксама кнігі з уладальніцкімі надпісамі першага народнага паэта Беларусі, які высока цаніў кнігу і зберагаў кніжныя скарбы. Гэтыя кнігі і сёння ашчадна захоўваюцца ў галоўнай бібліятэцы краіны як каштоўная памятка пра аднаго з яе першых чытачоў і сяброў.
Адкрыццё выстаўкі адбудзецца 1 лістапада 2017 г. а 16 гадзіне ў выставачнай зале Нацыянальнай бібліятэкі Беларусі (пр. Незалежнасці, 116, пам. 104).
Выстаўка працуе з 31 кастрычніка па 15 лістапада 2017 г. у адпаведнасці з умовамі наведвання міжнароднага выставачнага праекта ”Францыск Скарына і яго эпоха”.
Тэлефон для даведак: (8 017) 293 27 22.
Да 130-годдзя з дня нараджэння народных паэтаў Беларусі Нацыянальная бібліятэка стварыла віртуальны праект “Класікі сусветнай літаратуры Янка Купала і Якуб Колас”.
