Па выніках XII Міжнароднага конкурсу дзяржаў – удзельніц СНД “Мастацтва кнігі” дыплома I ступені ў намінацыі “Мая краіна” ўдастоена выданне “Кніжная спадчына Беларусі: з фондаў Нацыянальнай бібліятэкі Беларусі”.
Фотаальбом “Кніжная спадчына Беларусі”, выпушчаны выдавецтвам “Беларуская Энцыклапедыя імя Петруся Броўкі”, змяшчае выявы найбольш значных кніжных помнікаў Беларусі, якія захоўваюцца ў фондах Нацыянальнай бібліятэкі Беларусі. У выданні прадстаўлены рукапісныя і друкаваныя помнікі, створаныя ў XV–XX стагоддзях на тэрыторыі Беларусі беларускімі пісьменнікамі і выдаўцамі або прысвечаныя Беларусі. Унікальныя беларускія рукапісы, каштоўныя старадрукаваныя і рэдкія выданні мінулых стагоддзяў, цікавыя картаграфічныя і выяўленчыя выданні, кнігі з вядомых збораў дэманструюць самабытнасць айчыннай культуры, яе багацце і разнастайнасць.
Прадмову да кнігі напісаў дырэктар Нацыянальнай бібліятэкі Беларусі доктар педагагічных навук прафесар Раман Матульскі. Складальнікам кнігі з'яўляецца намеснік дырэктара бібліятэкі па навуковай рабоце і выдавецкай дзейнасці кандыдат культуралогіі Аляксандр Суша. Ён жа прымаў удзел у падрыхтоўцы кнігі “Францыск Скарына на мовах народаў свету” (Выдавецкі дом “Звязда”), якая заваявала таксама дыплом I ступені ў намінацыі “Дыялог культур”.
Усяго на конкурс было заяўлена 117 выданняў з 9 краін: Азербайджанскай Рэспублікі, Рэспублікі Арменія, Рэспублікі Беларусь, Грузіі, Рэспублікі Казахстан, Кыргызскай Рэспублікі, Расійскай Федэрацыі, Туркменістана і Эстоніі.
Рэспубліка Беларусь выступіла на конкурсе з 23 кнігамі павышанай якасці, 11 з якіх выпушчаны дзяржаўнымі выдавецтвамі, выдавецкімі дамамі і выдавецкімі арганізацыямі.
Сярод кніг, выдадзеных Нацыянальнай бібліятэкай Беларусі, на конкурс у намінацыі “Навука і інавацыя” было прадстаўлена “Тураўскае Евангелле. Туровское Евангелие. Turav Gospel”.
Члены міжнароднага журы з шасці краін, ацаніўшы прадстаўленыя выданні шляхам тайнага галасавання (па прынцыпе адна краіна – адзін голас), вызначылі пераможцаў у 11 намінацыях конкурсу.
Кнігам беларускіх выдавецтваў былі прысуджаны 12 дыпломаў рознай ступені: Гран-пры, пяць дыпломаў I ступені, пяць дыпломаў II ступені і адзін спецыяльны дыплом.
