19 лютага ў Нацыянальнай бібліятэцы Беларусі адбылося святочнае мерапрыемства “На славу нашоï преславноï Украïни”, прымеркаванае да 200-годдзя з дня нараджэння Тараса Шаўчэнкі.
Пад час мерапрыемства, арганізаванага Нацыянальнай бібліятэкай Беларусі і Пасольствам Украіны ў Рэспубліцы Беларусь, увазе гасцей былі прадстаўлены выстаўкі дзіцячых малюнкаў Шаўчэнкаўскага конкурсу, фотаматэрыялаў па ўвекавечанні памяці Тараса Шаўчэнкі ў Беларусі, твораў вялікага Кабзара і літаратуры пра яго творчую спадчыну.
Адкрыў мерапрыемства Надзвычайны і Паўнамоцны Пасол Украіны ў Рэспубліцы Беларусь Міхаіл Ежаль. “Талент Тараса Шаўчэнкі невымерны. Дастаткова сказаць, што ў яго гонар стаіць 1 384 помніка ў болей чым 30 краінах. Асабіста для мяне Тарас Шаўчэнка – гэта ўсё, што фармуе мае адносіны да ўкраінскай культуры і мастацтва”, – сказаў ён і запрасіў прысутных дакрануцца да спадчыны вялікага ўкраінскага пісьменніка.
Міхаіл Ежаль уручыў дырэктару Нацыянальнай бібліятэкі Беларусі Раману Матульскаму каляндар, у якім адлюстраваны шматлікія помнікі вялікаму Кабзару, і ручнік з выявай Тараса Шаўчэнкі. Самым чаканым падарункам сталі кнігі для Нацыянальнай бібліятэкі, з якімі можна было пазнаёміцца пад час мерапрыемства.
Як адзначыў Раман Матульскі, для бібліятэкі заўсёды прыемна атрымліваць у дар кнігі. “Фонд украінскай літаратуры фармуецца ў Нацыянальнай бібліятэцы з першых дзён, і пачатак яму быў пакладзены нават да яе заснавання. Таму ўкраінскі збор – адзін з найбольш буйных збораў у бібліятэцы, і ён заўсёды прыбаўляе”, – распавёў дырэктар і перадаў у сваю чаргу паслу Украіны кнігу пра гісторыю бібліятэк Беларусі, а таксама ўручыў яму чытацкі білет Нацыянальнай бібліятэкі Беларусі.
Пасля абмену падарункамі Раман Матульскі ўразіў гасцей чытаннем шаўчэнкаўскіх вершаў з прыжыццёвага зборніка пісьменніка. Выданне за свой век падарожнічала па многіх краінах і цяпер захоўваецца ў фондах Нацыянальнай бібліятэкі Беларусі. Нямала твораў слаўнага сына Украіны Тараса Шаўчэнкі прагучала і ў выкананні маладых артыстаў. Так, беларуская спявачка Вольга Сацюк падаравала прысутным самотную песню на словы паэта “Бандуристе, орле сизий…”. Юныя ўдзельнікі рэспубліканскага фестывалю-конкурсу “Пад крыламі Арыёна” прачыталі для гасцей шаўчэнкаўскія вершы, а таксама праспявалі эстрадныя і народныя песні на ўкраінскай мове.
Выстаўка малюнкаў, што адкрылася пад час мерапрыемства, дэманструе конкурсныя работы навучэнцаў дзіцячых мастацкіх школ – удзельнікаў Першага мінскага Шаўчэнкаўскага конкурсу. У малюнках праз палітру фарбаў дзеці паказалі не толькі герояў шаўчэнкаўскіх твораў, але і перадалі чароўную сілу прыроды, так лірычна апісаную майстрам мастацкага слова.
Экспазіцыя фотаматэрыялаў адлюстроўвае ўвекавечанне памяці Тараса Шаўчэнкі ў нашай рэспубліцы. Трэба адзначыць, што на Беларусі помнікі, пастаменты з бюстам украінскага пісьменніка ўсталяваны ў Брэсце, Гомелі, Мінску, Магілёве, Слуцку, а імем Тараса Шаўчэнкі названа шмат вуліц і бульвараў у абласных і раённых цэнтрах, – усё гэта з’яўляецца пацверджаннем таго, што беларускі народ з вялікай павагай і пашанай ставіцца да гэтай асобы.
Каб аддаць даніну памяці вялікаму ўкраінскаму паэту, пісьменніку і мастаку, да юбілею з дня нараджэння Тараса Шаўчэнкі Нацыянальная бібліятэка Беларусі падрыхтавала кніжную выстаўку “На славу нашоï преславноï Украïни”. Экспазіцыя налічвае каля 200 выданняў, сярод якіх зборнікі твораў, літаратура пра жыццё і творчасць пісьменніка, багаты ілюстрацыйны матэрыял.
Выстаўка размясцілася ў кальцавым калідоры на 3-м паверсе бібліятэкі, дзе застанецца да ліпеня. У сваю чаргу выстаўкі фотаматэрыялаў і малюнкаў можна будзе ўбачыць у галерэі “Лабірынт” (3-ці паверх) да 6 сакавіка 2014 года.
Тэлефон для даведак: (8 017) 293 27 56.
Е-mail: pr@nlb.by