10 снежня ў бібліятэцы прайшла прэзентацыя выдання Усеагульнай дэкларацыі праў чалавека на беларускай мове.
Выданне найважнейшага гістарычнага дакумента прымеркавана да 70-гадовага юбілею Усеагульнай дэкларацыі праў чалавека. Над перакладам тэксту працавалі спецыялісты Цэнтра даследаванняў беларускай культуры, мовы і літаратуры Нацыянальнай акадэміі навук Беларусі. Кнігу дапоўнілі фатаграфіі з архіва Арганізацыі Аб'яднаных Нацый.
У прэзентацыі прынялі ўдзел намеснік міністра замежных спраў Рэспублікі Беларусь Андрэй Дапкюнас, пастаянны каардынатар ААН у Рэспубліцы Беларусь Іаана Казана-Вішнявецкі, намеснік старшыні Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Нацыянальнага сходу Рэспублікі Беларусь Валянціна Ражанец.
Экзэмпляр выдання Дэкларацыі на беларускай мове быў перададзены ў галоўную кніжную скарбніцу краіны. Дырэктар Нацыянальнай бібліятэкі Беларусі Раман Матульскі падзякаваў перакладчыкам і выдаўцам за працу і адзначыў, што з гэтага часу Дэкларацыя будзе даступна шырокаму колу чытачоў.
Упрыгожыла прэзентацыю выдання выступленне таленавітых музыкаў струннага квартэта “Вестфалія”.
10 снежня 1948 года на Генеральнай асамблеі Арганізацыя Аб'яднаных Нацый зацвердзіла Усеагульную дэкларацыю праў чалавека, заклікаўшы ўсе дзяржавы – члены ААН зрабіць усё магчымае для яе папулярызацыі. Эпахальны дакумент упершыню вызначыў неад'емныя правы кожнага чалавека незалежна ад яго расы, полу, мовы, рэлігіі, палітычных ці іншых перакананняў, нацыянальнага або сацыяльнага паходжання, маёмаснага становішча.
Матэрыял падрыхтаваны аддзелам сувязей з грамадскасцю.
Глядзіце таксама "Сёння адзначаецца 70 гадоў Усеагульнай дэкларацыі праў чалавека" на тэлеканале "Беларусь 1" і рэпартажы тэлеканалаў:
АНТ
СТБ