1 верасня – Дзень ведаў, свята кветак, усмешак і радасці ад доўгачаканай сустрэчы з аднакласнікамі і любімымі настаўнікамі пасля летняй разлукі.
Хлапчукі і дзяўчынкі зноў прыйшлі ў свае класы, разгарнулі сшыткі і падручнікі. Але не ўсе правялі гэты дзень за звычайнымі партамі.
Першы ўрок “2018 год – Год малой радзімы” для вучняў мінскай гімназіі № 1 імя Ф. Скарыны стаў асаблівым, бо ён прайшоў у Нацыянальнай бібліятэцы Беларусі.
У сэрцы кожнага з нас значнае месца займае малая радзіма, той куточак, дзе з’явіўся на свет, дзе жывуць бацькі і сябры, дзе знаходзіцца родны дом. Дзеці з захапленнем расказвалі пра тое, з чаго для іх пачынаецца малая радзіма, разважалі пра яе ролю ў жыцці чалавека.
Працягам урока стала захапляльная экскурсія па будынку бібліятэкі. Юныя госці наведалі музей кнігі і пазнаёміліся з выстаўкай “Буквары народаў свету”, дзе прадстаўлены разнастайныя і непаўторныя варыянты самай першай кнігі па навучанні грамаце.
На сваім першым уроку ў Нацыянальнай бібліятэцы дзеці атрымалі новыя веды, прыемныя ўражанні і зарад добрага настрою на цэлы навучальны год.
