Ці жадаюць дзеці на вакацыях вучыцца? Нацыянальная бібліятэка ламае стэрэатыпы і прапануе юным наведвальнікам паўдзельнічаць у музейных занятках.
Школьнікі, адгукнуўшыся на прапанову, не шкадуюць, бо атрымліваюць унікальны вопыт, які аб’ядноўвае веды, эстэтычнае ўспрыманне, эмацыйнае перажыванне дачынення да гісторыі і культуры.
На занятках бібліятэка ператвараецца ў камунікатыўную прастору, дзе дзеці спасцігаюць гісторыю кніжнай культуры праз дыялог, гульні і творчасць.
Навучанне адбываецца з дапамогай ведаў і дзеянняў. Школьнікі разглядаюць экспанаты ў музеі кнігі, слухаюць інфармацыю і адначасова вывучаюць разнастайнасць кніжных культур і традыцый розных эпох. Працэс навучання праз дзеянне ўключае ў залежнасці ад тэмы заняткаў альбо распрацоўку ўнікальнага дызайну бібліятэкі, альбо стварэнне з драўляных палачак “бамбукавай кнігі”, альбо маляванне рукапіснай буквіцы. У выніку кожны ўдзельнік атрымлівае цікавы вопыт і стварае свой твор, прысвечаны кніжнай культуры.
Асобная ўвага на занятках надаецца Брэсцкай Бібліі, арыгінал і факсіміле якой цяпер прадстаўлены на выставе “Брэсцкая Біблія: адкрыты дотык” у музеі кнігі.
Музейныя заняткі арганізаваны ў рамках праекта "У госці да кніг".
На фотаздымках – удзельнікі заняткаў з сярэдняй школы № 190 (1-шы клас), сярэдняй школы № 94 г. Мінска (4-ты клас) і Бараўлянскай сярэдняй школы (3-ці клас).
Матэрыял прадастаўлены навукова-даследчым аддзелам кнігазнаўства.
