На выставе “Узноўлены шэдэўр” адбыліся музейныя заняткі. Удзельнікі мелі магчымасць параўнаць гравюры, створаныя ў розных тэхніках і эпохах, а таксама ўбачыць унікальную друкаваную дошку XVII стагоддзя.
Што такое малюнак, вядома кожнаму, а вось што такое гравюра, ведаюць, мабыць, не ўсе. Гравёр не малюе на паперы, а наносіць малюнак спачатку на якую-небудзь цвёрдую паверхню, а ўжо потым робіць яго адбітак на паперы. Самая старажытная гравіравальная тэхніка – гэта гравюра на дрэве. Затым з'яўляецца разцовая гравюра на метале.
На занятках з кандыдатам культуралогіі Алесем Сушай удзельнікі разбіраліся, навошта мастак выконвае складаную і карпатлівую працу, вырабляючы друкаваную дошку, якія існуюць тэхнікі гравюр у залежнасці ад матэрыялаў і спосабаў апрацоўкі, колькі адбіткаў можна вырабіць з адной дошкі і г.д.
Гравюры, як і кнігі, варта ўмець чытаць, каб зразумець светапогляд аўтара і дух эпохі. Але калі разабрацца ў гэтай няпростай справе, то разглядаць творы гравіравальнага мастацтва становіцца вельмі цікава!
Матэрыял пададзены навукова-даследчым аддзелам кнігазнаўства.
