22 жніўня ў дзіцячым пакоі прайшлі заняткі “Мультчытайка” паводле казачнай аповесці Астрыд Ліндгрэн “Піпі Доўгаяпанчоха”.
Вясёлая дзяўчынка Піпі з вяснушкамі і задзірыстымі рыжымі касічкамі, фантазёрка і гарэза, чароўным чынам змагла перадаць з прачытаных старонак кнігі і кадраў мультфільма радасны і бесклапотны настрой.
Прыгоды Піпі захопліваюць і здзіўляюць. Яна выступае ў цырку, носіць доўгія панчохі розных колераў, любіць сваіх сяброў, заўсёды развесяліць сумнага, выручыць з бяды і заступіцца за слабага, пры гэтым зусім забываючы пра сябе.
Юныя ўдзельнікі “Мультчытайкі” больш глыбока ўспрынялі незвычайны вобраз гераіні, адказаўшы на пытанні віктарыны, і запомнілі яе, стварыўшы з каляровай паперы яркую аплікацыю.
Чытайце таксама пра іншыя мерапрыемствы дзіцячага пакоя і сачыце за анонсамі наступных заняткаў.
Матэрыял пададзены аддзелам запісу і інфармавання карыстальнікаў.