17–19 верасня ў Калінінградзе адбылася XVI сесія Міжнароднай бібліятэчнай філасофскай школы “Сучасная бібліятэка ў кантэксце нацыянальных праграм развіцця культуры, адукацыі і навукі”.
На працягу трох дзён на гасціннай зямлі І. Канта вядучыя спецыялісты і кіраўнікі бібліятэк, музеяў, навукова-даследчых арганізацый, адукацыйных устаноў абмяркоўвалі пытанні трансфармацыі бібліятэк у лічбавым свеце, эвалюцыі форм і метадаў работы агульнадаступных бібліятэк, разглядалі сусветныя тэндэнцыі развіцця ўстаноў культуры.
Па традыцыі адкрыццё філасофскай школы пачалося з цырымоніі ўскладання кветак да мемарыяльнага комплексу І. Канта.
Рэспубліку Беларусь на мерапрыемстве прадставіла Марына Пшыбытка, загадчыца навукова-даследчага аддзела бібліятэказнаўства Нацыянальнай бібліятэкі Беларусі (НББ). У сваім дакладзе “Бібліятэкі Беларусі ў эпоху лічбавай трансфармацыі грамадства” яна падзялілася вынікамі навуковых даследаванняў НББ па пытаннях інфарматызацыі бібліятэк, раскрыла асаблівасці працы беларускіх бібліятэк у лічбавую эпоху.
Вынікам зацікаўленых дыскусій стала кансалідацыя поглядаў і перакананняў удзельнікаў на падыходы да павышэння эфектыўнасці развіцця бібліятэчнай галіны, што будзе садзейнічаць інтэлектуальнаму росквіту грамадства і ўнясе важкі ўклад у далейшае ўмацаванне супрацоўніцтва паміж дзяржавамі.
Матэрыял прадастаўлены навукова-даследчым аддзелам бібліятэказнаўства.