13 кастрычніка ў межах культурна-пазнавальных сустрэч “Па-за вернісажам” мінскія экскурсаводы наведалі выставачны праект “Сімвал беларускай нацыянальнай культуры”, прысвечаны 100-годдзю Нацыянальнага акадэмічнага тэатра імя Я. Купалы.
Супрацоўніца аддзела галерэйна-выставачнай дзейнасці, адна са стваральніц выстаўкі Надзея Красуцкая распавяла ўдзельнікам сустрэчы пра гісторыю тэатра і знакамітых купалаўцаў, якія паўплывалі на развіццё нацыянальнай сцэны Беларусі. Гледачы пабачылі рэдкія выданні класікаў айчыннай літаратуры, арыгінальныя эскізы знакамітага тэатральнага мастака А. Марыкса, фотаздымкі з архіва тэатра, тэатральныя касцюмы і іншыя цікавыя экспанаты.
Дамовіцца аб знаёмстве з гэтай і іншымі выстаўкамі галерэйна-выставачнага комплексу, замовіць час і дату можна па e-mail gal.nlb@gmail.com. Сустрэчы праводзяцца з невялікімі (ад 6 да 10 чалавек) групамі ўдзельнікаў.
Уваход – па чытацкім білеце або білеце сацыякультурнага цэнтра.
Ласкава запрашаем у нашу гасцінную творчую прастору па-за вернісажамі!
Матэрыял пададзены аддзелам галерэйна-выставачнай дзейнасці.
