9 студзеня 2008 года на базе НББ адбыўся метадычны семінар па тэме “Нацыянальная бібліятэка Беларусі – вядучы інфармацыйны цэнтр краіны”, у якім прынялі ўдзел начальнікі клубаў, афіцэры па арганізацыі вольнага часу і бібліятэчныя работнікі Узброеных Сілаў Рэспублікі Беларусь.
Мэта семінара – азнаямленне ўдзельнікаў з электроннымі інфармацыйнымі рэсурсамі НББ і яе магчымасцямі ў ажыццяўленні абслугоўвання карыстальнікаў у віртуальным асяроддзі. Праводзілі мерапрыемства Кірухіна Л.Г., намеснік дырэктара НББ па навуковай рабоце і сувязям з грамадскасцю, і Ціханчук П.М., галоўны спецыяліст Галоўнага ўпраўлення ідэалагічнай работы Міністэрства абароны РБ. Адкрыў семінар Матульскі Р.С., дырэктар Нацыянальнай бібліятэкі Беларусі, які прадставіў Нацыянальную бібліятэку як інфармацыйны і сацыякультурны цэнтр. Фісенка Л.У., заг. аддзела бібліятэчна-інфармацыйных тэхналогій, пазнаёміла прысутных з электроннымі інфармацыйнымі рэсурсамі, генераванымі НББ. Тулупава А.В., заг. сектара аддзела даведачна-інфармацыйнага абслугоўвання, паведаміла ўдзельнікам аб базах даных вядучых сусветных вытворцаў, доступ да якіх мае Нацыянальная бібліятэка. Таксама выступілі Яроха Т.А., заг. аддзела даведачна-інфармацыйнага абслугоўвання, і Курыліна Л.І., заг. аддзела міжбібліятэчнага абанемента і дастаўкі дакументаў. Яны прадэманстравалі магчымасці Нацыянальнай бібліятэкі па абслугоўванні ў віртуальным асяроддзі і звярнулі асаблівую ўвагу на віртуальную даведачную службу «Спытай бібліятэкара» і службу электроннай дастаўкі дакументаў.
Пашкевіч А.К., намеснік галоўнага рэдактара рэдакцыі сайта Міністэрства абароны РБ, расказаў аб працы сайта, прадэманстраваў яго магчымасці. Аладка А.Я., начальнік 4-га аддзела Галоўнага ўпраўлення ідэалагічнай работы Міністэрства абароны РБ, падзякаваў спецыялістам НББ за дапамогу ў арганізацыі і правядзенні вучэбна-метадычнага занятку і падарыў бібліятэцы электронную версію часопіса «Армия» за 10 гадоў.