29 лістапада на базе Нацыянальнай бібліятэкі адбыўся семінар для бібліятэкараў устаноў агульнай сярэдняй адукацыі Мінскага раёна па тэме “Інфармацыйна-бібліятэчнае суправаджэнне адукацыйнага працэсу. Дзіцячае чытанне – шлях да творчасці і поспеху: новыя магчымасці сацыялізацыі і бібліятэрапіі ў школьнай бібліятэцы”.
Спікерамі на мерапрыемстве выступілі кіраўнікі і спецыялісты Нацыянальнай бібліятэкі Беларусі.
Анастасія Маслоўская, загадчыца сектара навукова-даследчага аддзела бібліятэказнаўства, пазнаёміла слухачоў з вынікамі вывучэння інфармацыйных патрэб карыстальнікаў публічных бібліятэк, якое ажыццяўлялася ў 2022 годзе ў рамках навукова-даследчай работы “Даследаванне супольнага фонду публічных бібліятэк Рэспублікі Беларусь для вызначэння найбольш запатрабаванай карыстальнікамі літаратуры і неабходнасці абнаўлення”.
Кацярына Седнева, вядучы бібліятэкар навукова-даследчага аддзела бібліятэказнаўства, распавяла аб рэспубліканскім прафесійным конкурсе “Бібліятэка – цэнтр духоўнай асветы і выхавання”, удзел у якім штогод бяруць публічныя бібліятэкі, бібліятэкі ўстаноў адукацыі і бібліятэкі Беларускага экзархату.
Вольга Палунчанка, галоўны бібліёграф аддзела даведачна-інфармацыйнага абслугоўвання, прэзентавала інфармацыйныя рэсурсы і сэрвісы Нацыянальнай бібліятэкі Беларусі, іх магчымасці і патэнцыял для адукацыйнага працэсу.
Матэрыял пададзены навукова-даследчым аддзелам бібліятэказнаўства.
