13–14 кастрычніка ў рамках метадычнага суправаджэння дзейнасці публічных бібліятэк спецыялісты навукова-даследчага аддзела бібліятэказнаўства Нацыянальнай бібліятэкі Беларусі наведалі бібліятэкі Віцебскага рэгіёна.
У першы дзень быў арганізаваны круглы стол “Актуальныя праблемы развіцця публічных бібліятэк Віцебскай вобласці” з удзелам кіраўнікоў і спецыялістаў бібліятэк Віцебшчыны.
Загадчыца навукова-даследчага аддзела бібліятэказнаўства Нацыянальнай бібліятэкі Беларусі Марына Пшыбытка ў сваім выступленні “Публічныя бібліятэкі Рэспублікі Беларусь: актуальныя задачы і іх рашэнні” прадставіла параўнальны аналіз дзейнасці бібліятэк краіны, азнаёміла ўдзельнікаў круглага стала з “Рэкамендацыямі па метадычным суправаджэнні дзейнасці публічных бібліятэк Рэспублікі Беларусь”, распрацаванымі НББ у 2021 годзе, рашэннем калегіі Міністэрства культуры Рэспублікі Беларусь “Аб арганізацыі работы публічных бібліятэк. Праблемы, перспектывы, шляхі развіцця”, акрэсліла асноўныя тэндэнцыі развіцця бібліятэчнай справы ў Рэспубліцы Беларусь.
Пытанні заканадаўчага забеспячэння дзейнасці бібліятэк асвятліла загадчыца сектара навукова-арганізацыйнага забеспячэння бібліятэчнай дзейнасці навукова-даследчага аддзела бібліятэказнаўства Нацыянальнай бібліятэкі Беларусі Наталля Замаева, выступіўшы з дакладам “Прававое рэгуляванне дзейнасці публічных бібліятэк у Рэспубліцы Беларусь”. Спецыялісты бібліятэк атрымалі поўную інфармацыю аб законах, пастановах, палажэннях, якія рэгулююць бібліятэчную дзейнасць па асноўных яе кірунках: фарміраванні інфармацыйных рэсурсаў, арганізацыі абслугоўвання, інфарматызацыі і тэхналагічным развіцці, навуковай рабоце.
Загадчыца сектара маніторынгу і каардынацыі дзейнасці бібліятэк навукова-даследчага аддзела бібліятэказнаўства Нацыянальнай бібліятэкі Беларусі Анастасія Маслоўская ў сваім выступленні падняла праблемы камплектавання фондаў публічных бібліятэк сацыяльна значнымі выданнямі.
Супрацоўнікі Нацыянальнай бібліятэкі Беларусі адказалі на шматлікія пытанні калег.
Пасля кіраўнікі абласной і нацыянальнай бібліятэк абмеркавалі нарматыўныя і арганізацыйныя дакументы, якія ўтвараюцца ў дзейнасці галоўнай бібліятэкі вобласці.
Завяршыўся першы дзень сумеснай працы прафесійнай экскурсіяй па Віцебскай абласной бібліятэцы, якую правяла яе дырэктар Таццяна Адамян. Яна пазнаёміла калег з Мінска з дасягненнямі ўстановы за апошнія гады, камфортнымі ўмовамі, створанымі для наведвальнікаў і персаналу, агучыла праблемы, якія яшчэ трэба вырашыць.
14 кастрычніка дэлегацыя з нацыянальнай і абласной бібліятэк наведала цэнтральную бібліятэку Віцебскага раёна, дзе разам з калегамі з Віцебскага рэгіёна абмеркавала арганізацыю працы бібліёбуса.
Напрыканцы свайго візіту супрацоўнікі НББ пазнаёміліся з працай сельскай бібліятэкі вёскі Сасноўка.
Падчас наведвання ўстаноў Віцебскага рэгіёна ў рамках унутрырэспубліканскага дакументаабмену Нацыянальная бібліятэка Беларусі перадала ў фонды бібліятэк каля 350 экз. мастацкай, навукова-папулярнай і іншай літаратуры.
Усе ўдзельнікі прафесійнага візіту адзначылі творчае, неабыякавае і вельмі адказнае стаўленне да сваёй справы бібліятэкараў Віцебскай вобласці і, як следства, велізарную запатрабаванасць бібліятэк у мясцовых жыхароў.
Матэрыял пададзены навукова-даследчым аддзелам бібліятэказнаўства.
