Мемарандум аб узаемаразуменні паміж нацыянальнымі бібліятэкамі Беларусі і Пакістана падпісаны ў рамках афіцыйнага візіту ў Ісламскую Рэспубліку Пакістан беларускай дэлегацыі на чале з Прэзідэнтам Рэспублікі Беларусь А. Лукашэнкам.
Падпісанне мемарандума аб узаемаразуменні адбылося падчас наведвання Нацыянальнай бібліятэкі Пакістана міністрам культуры Рэспублікі Беларусь Барысам Святловым, міністрам інфармацыі Рэспублікі Беларусь Ліліяй Ананіч, дырэктарам Нацыянальнай бібліятэкі Беларусі Раманам Матульскім. У рамках сустрэчы беларускіх дэлегатаў з прадстаўнікамі Нацыянальнай бібліятэкі Пакістана і Бібліятэчнай асацыяцыі Пакістана ўдзельнікі абмяняліся думкамі аб сучасным стане бібліятэчнай і кнігавыдавецкай справы ў Беларусі і Пакістане, абмеркавалі перспектывы развіцця супрацоўніцтва паміж дзвюма краінамі.
У Нацыянальнай бібліятэцы Пакістана быў арганізаваны семінар, прысвечаны сучаснаму стану спраў і новым магчымасцям ва ўзаемадзеянні паміж нацыянальнымі бібліятэкамі Беларусі і Пакістана. У сваім выступленні Раман Матульскі прадставіў Нацыянальную бібліятэку Беларусі як сучасны інфармацыйны і сацыякультурны цэнтр сусветнага ўзроўню, які іграе важную ролю ў сацыяльна-эканамічным развіцці краіны.
Пашырэнне супрацоўніцтва ў галіне бібліятэчнай справы паміж Рэспублікай Беларусь і Ісламскай Рэспублікай Пакістан мае на ўвазе наступныя кірункі: удзел прадстаўнікоў нацыянальных бібліятэк дзвюх краін у навукова-практычных канферэнцыях і семінарах, якія праводзяцца ў Беларусі і Пакістане; публікацыі ў прафесійных выданнях артыкулаў аб сучасным стане бібліятэчнай справы дзвюх краін; кнігаабмен актуальнымі выданнямі паміж дзвюма нацыянальнымі бібліятэкамі; сумеснае правядзенне кніжных выставак і іншых мерапрыемстваў; распрацоўку праекта адкрыцця ў Нацыянальнай бібліятэцы Пакістана беларускага інфармацыйна-культурнага цэнтра імя Ф. Скарыны.
У адпаведнасці з праграмай афіцыйнага візіту дырэктар Нацыянальнай бібліятэкі Раман Матульскі таксама прыняў удзел у рабоце першага пакістанска-беларускага дзелавога і інвестыцыйнага форуму, мерапрыемствах з удзелам кіраўніка дзяржавы Аляксандра Лукашэнкі, шэрагу перагавораў міністра культуры Барыса Святлова і міністра інфармацыі Ліліі Ананіч.
