У сакавіку ў “Клубе кніжных прафесараў” адбыліся заняткі “Кніжная культура Радзівілаў”. Радзівілы пакінулі адметны след у гісторыі развіцця кніжнай культуры як заснавальнікі друкарняў і бібліятэк, а таксама аўтары кніг.
Удзельнікі заняткаў пабачылі нясвіжскія выданні XVIII ст. і кнігі з бібліятэкі Радзівілаў з экслібрысамі, а таксама адзіны ў Беларусі асобнік XVIII ст. драматычных твораў Францішкі Уршулі Радзівіл “Камедыі і трагедыі”.
Міхал Казімір Радзівіл Рыбанька, вялікі гетман літоўскі, у 1750 г. атрымаў дазвол ад караля Аўгуста ІІІ на адкрыццё друкарні ў Нясвіжы. Праз год пасля заснавання Рыбанька перадаў друкарню езуітам, але надалей падтрымліваў яе фінансава. Друкарня праіснавала каля 50 гадоў і служыла пераважна Радзівілам і мясцоваму езуіцкаму калегіуму. У нясвіжскім кнігадрукаванні пераважалі польская і лацінская мовы. Польская мова была пануючай літаратурнай мовай у Рэчы Паспалітай. Лацінскай мове асаблівая ўвага надавалася ў калегіуме, бо вучні павінны былі валодаць ёй дасканала.
Францішка Уршуля Радзівіл, жонка вялікага гетмана літоўскага Міхала Казіміра Рыбанькі, вядомая найперш як стваральніца ў нясвіжскай рэзідэнцыі Радзівілаў самабытнага тэатра, для якога пісала п’есы і ставіла іх на сцэне. Змест тэатральнага рэпертуару складалі творы Уршулі, апублікаваныя ў Нясвіжскай друкарні, якая была адкрыта таксама не без удзелу княгіні. Першае нясвіжскае выданне збору твораў “Камедыі і трагедыі” з’яўляецца вельмі рэдкім. Нацыянальная бібліятэка Беларусі валодае экзэмплярам другога выдання “Камедыі і трагедыі” (Жоўква, 1754), якое прадстаўлена ў экспазіцыі. Гэта выданне мае цікавыя гравюры, разнастайныя застаўкі і канцоўкі, выкананыя гравёрам Міхалам Жукоўскім.
Творчым заданнем было стварыць тэатральныя дэкарацыі да пастановак па кнізе “Камедыі і трагедыі” Уршулі Радзівіл. Юныя дэкаратары вырабілі макеты, якія ўяўлялі ў мініяцюры сцэну з кулісамі і заслонамі, дзе былі адлюстраваны герб Радзівілаў і гравюры са старадруку XVIII ст.
Матэрыял прадастаўлены навукова-даследчым аддзелам кнігазнаўства.
