19 сакавіка 2009 года ў галерэі “Лабірынт” прайшла літаратурна-мастацкая вечарына “Горьким моим словом посмеюся…”, прысвечаная 200-годдзю з дня нараджэння М.В. Гогаля (1809–1852).
Гогалеўская вечарына ў Нацыянальнай бібліятэцы Беларусі стала яркай падзеяй культурнага жыцця сталіцы. На мерапрыемстве прысутнічалі прадстаўнікі Міністэрства культуры Рэспублікі Беларусь, Міністэрства адукацыі Рэспублікі Беларусь, Нацыянальнай камісіі Рэспублікі Беларусь па справах ЮНЕСКА і Пасольстваў Расійскай Федэрацыі і Украіны ў Рэспубліцы Беларусь. У юбілейнай вечарыне прынялі ўдзел прафесарска-выкладчыцкі cастаў ВНУ гуманітарнага і мастацтвазнаўчага профілю, бібліятэчная грамадскасць, мастацтвазнаўцы, рэжысёры і артысты тэатраў.
З гасцямі вёў гутарку загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Адамавіч Ястраб. Пра асобу вялікага класіка і яго літаратурную спадчыну разважалі Надзвычайны і Паўнамоцны Пасол Украіны ў Рэспубліцы Беларусь Ігар Дзмітрыевіч Ляхавы, адказны сакратар Нацыянальнай камісіі Рэспублікі Беларусь па справах ЮНЕСКА Алена Іванаўна Красоўская, загадчык кафедры рускай літаратуры БДУ доктар педагагічных навук, прафесар Святлана Якаўлеўна Ганчарова-Грабоўская, дацэнт кафедры рускай і замежнай літаратуры БДПУ імя М. Танка, кандыдат педагагічных навук Таццяна Сцяпанаўна Куцанава, рэжысёр-пастаноўшчык Нацыянальнага акадэмічнага драматычнага тэатра імя М. Горкага Валянціна Рыгораўна Еранькова, намеснік дырэктара Нацыянальнай бібліятэкі Беларусі па навуковай рабоце і сувязях з грамадскасцю Людміла Генадзьеўна Кірухіна і інш.
Прывітанне ад імя Надзвычайнага і Паўнамоцнага Пасла Расійскай Федэрацыі ў Рэспубліцы Беларусь Аляксандра Аляксандравіча Сурыкава зачытаў саветнік Пасольства Расійскай Федэрацыі ў Рэспубліцы Беларусь Сяргей Васільевіч Бярэзны.У рамках мерапрыемства адбылося адкрыццё кніжнай выстаўкі, прысвечанай класіку рускай літаратуры. У экспазіцыі выстаўкі прадстаўлена каля 500 выданняў літаратуразнаўчага і біяграфічнага плану. З кніжнай экспазіцыяй можна пазнаёміцца да 14 мая 2009 года.
Акцёры Нацыянальнага акадэмічнага драматычнага тэатра імя М. Горкага прадставілі ўвазе публікі фрагменты са спектакля па п’есе М.В. Гогаля “Жаніхі”. Былі паказаны відэаматэрыялы з архіваў кінафонду – мастацкія фільмы 1913 г., 1937 г., 1961 г., знятыя па гогалеўскіх творах.