21–22 мая намеснік дырэктара Нацыянальнай бібліятэкі Беларусі Таццяна Кузьмініч прыняла ўдзел у рабоце міжнароднай выстаўкі “Летапіс сталіц свету” і навуковай канферэнцыі, прысвечаных 20-годдзю сталіцы Казахстана – Астане.
Мерапрыемствы былі арганізаваны Нацыянальнай акадэмічнай бібліятэкай Рэспублікі Казахстан пры падтрымцы Міністэрства культуры і спорту Рэспублікі Казахстан.
Нацыянальная бібліятэка Беларусі (НББ) прадставіла ў Астане два тэматычныя блокі – “Цэнтры беларускай дзяржаўнасці” і “Беларусь суверэнная”. Экспанаваліся сучасныя выданні, прысвечаныя краіне ў цэлым, а таксама Тураву, Полацку, Мінску і іншым гарадам, якія ў розныя гістарычныя перыяды былі цэнтрамі беларускіх зямель.
Стэнд нашай бібліятэкі прыцягнуў увагу наведвальнікаў выстаўкі. У іх ліку быў казахскі паэт, вучоны-абаевед Мурат Султанбекаў. Ён перадаў для фондаў НББ чатыры аўтарскія выданні.
