28 мая ў галерэі “Лабірынт” адбылася лекцыя-канцэрт “Палітра фарбаў рамантызму” з цыкла “Прагулкі скрозь стагоддзі”.
Як вядома, у XIX стагоддзі адбыўся актыўны ўздым культуры, адзначаны стварэннем шматлікіх шэдэўраў ва ўсіх відах мастацтва, у тым ліку і ў музыцы. Нацыянальныя кампазітарскія школы прадставілі шырокую панараму імёнаў. Упершыню пра сябе на ўвесь свет загаварылі Нарвегія, Чэхія, Польшча; па-новаму адкрыліся музыканты Заходняй Еўропы. Таксама адбыліся значныя пераўтварэнні ў вобразна-тэматычнай сферы. На першы план выходзіць народна-жанравы, казачна-фантастычны, экзальтавана-лірычны пачатак.
Закрываючы вясновы сезон, удзельнікі лекцыі-канцэрта – музыканты-аматары пазнаёмілі слухачоў з маляўнічай і ўзнёсла-вытанчанай музычнай палітрай эпохі рамантызму. Праграмныя сачыненні для фартэпіяна “Ружы з поўдня”, “Вясновыя галасы” І. Штрауса, “Раніца” і “Да вясны” Э. Грыга, а таксама многія іншыя стваралі сонечную і цёплую атмасферу, сугучную прыродзе, вясне ў самым яе разгары.
Чакаем усіх жадаючых на наступным канцэрце “Узлёт рускай музычнай думкі”, дзе прагучаць творы выдатных рускіх кампазітараў М.І. Глінкі, П.І. Чайкоўскага, С.В. Рахманінава і інш. Новы сезон адкрыецца восенню, 24 верасня ў 15.00.
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.