2 кастрычніка ў бібліятэцы ў межах выставачнага праекта “Беларусь і Біблія” адбылася лекцыя “Археалагічныя і рукапісныя сведчанні пра Біблію” сусветна вядомага эксперта па старажытных рукапісах Скота Кэрала.
Скот Кэрал – доктар (PhD), спецыяліст у галіне біблейскай археалогіі, кіраўнік арганізацыі “Групы даследавання рукапісаў” (ЗША), заснавальнік музея Бібліі ў Вашынгтоне, куратар выставачнага праекта “Беларусь і Біблія”. На працягу дзесяцігоддзяў ён займаўся вывучэннем і апісаннем самых каштоўных і старажытных рукапісаў у свеце.
Скот Кэрал расказаў пра знаходкі самых старажытных сведчанняў пра Біблію. Захаваліся сотні тысяч пісьмовых крыніц, якія ўтрымліваюць каштоўныя звесткі пра біблейскі свет і тэкст Бібліі. Больш за 500 тыс. клінапісных таблічак дайшлі да нас з часоў старажытнага Блізкага Усходу. Захавалася больш за 500 тыс. папірусаў, галоўным чынам з Егіпта.
Лектар распавёў пра адно з самых значных археалагічных адкрыццяў усіх часоў – знаходжанне сувояў Мёртвага мора. Скруткі складаюцца з тысячы тэкстаў, у асноўным на іўрыце. Больш за тысячу дакументаў былі ідэнтыфікаваны, і больш за 300 з іх уяўляюць сабой тэксты Старога Запавету.
Самыя раннія фрагменты Новага Запавету датуюцца ўсяго некалькімі дзесяцігоддзямі пасля таго, як яны былі напісаны. Поўныя Евангеллі і Пасланні захаваліся толькі з III ст. н.э., а поўныя Бібліі – з IV–V стст.
Многія рукапісы, пра якія расказваў дакладчык, можна пабачыць на выстаўцы “Беларусь і Біблія”.
На лекцыі прысутнічалі шматлікія беларускія вучоныя, а таксама студэнты гістарычнага факультэта і Інстытута тэалогіі Беларускага дзяржаўнага ўніверсітэта.