22 мая а 11-й гадзіне напярэдадні ХІХ Міжнародных Кірыла-Мяфодзіеўскіх чытанняў адбудзецца круглы стол “Полацкае Евангелле – першакніга беларускага народа”.
Круглы стол прысвечаны ўнікальнаму помніку славянскага пісьменства – Полацкаму Евангеллю канца XII – пачатку XIII ст., які самім фактам свайго існавання дэманструе багацце і старажытнасць духоўнай культуры Беларусі. Гэты рукапіс цалкам можна назваць першакнігай беларусаў, паколькі больш ранніх кніг, створаных у Беларусі, практычна не захавалася (за выключэннем 10 асобных аркушаў, што засталіся ад вядомага Тураўскага Евангелля).
Значэнне Полацкага Евангелля яшчэ і ў тым, што яно па часе стварэння ўваходзіць у лік найпершых кніг усіх славян, а таму з’яўляецца знакавым помнікам усёй еўрапейскай культуры.
У выніку шматгадовай плённай працы прадстаўнікоў нацыянальных бібліятэк Беларусі і Расіі, Нацыянальнай акадэміі навук Беларусі, Выдавецтва Беларускага экзархата нядаўна быў рэалізаваны ўнікальны праект факсімільнага ўзнаўлення Полацкага Евангелля. Факсіміле дазволіла максімальна аўтэнтычна ўзнавіць знешні выгляд і арыгінальную структуру кніжнага помніка, вярнуць яго ў культурную прастору Беларусі.
На пасяджэнні круглага стала будуць прысутнічаць непасрэдныя стваральнікі факсімільнага выдання. Цікавы вопыт ўдзельнікаў праекта будзе ўпершыню прадстаўлены шырокай грамадскасці.
Мерапрыемства адлюструе сучасныя дасягненні навукоўцаў у справе вывучэння гэтага каштоўнага кніжнага помніка Беларусі, а таксама акрэсліць перспектывы далейшай працы бібліятэк, архіваў, музеяў, навуковых і навучальных устаноў, выдавецтваў і грамадскіх арганізацый па вывучэнні, вяртанні і папулярызацыі кніжнай спадчыны Беларусі.
Круглы стол ладзіцца ў Нацыянальнай бібліятэцы Беларусі (зала адукацыйных тэхналогій, 3-ці паверх, правы бакавы ўваход).
Кантактны тэлефон: (8 017) 293 27 82.