23 лістапада на базе Нацыянальнай бібліятэкі Беларусі прайшоў круглы стол “Інавацыйныя тэхналогіі для бібліятэк: тэорыя і практыка”.
Круглы стол прайшоў у рамках метадычнага аб’яднання бібліятэкараў Мінскага раёна Мінскай вобласці, на якім быў абмеркаваны шэраг пытанняў. У пасяджэнні ўзялі актыўны ўдзел супрацоўнікі Нацыянальнай бібліятэкі Беларусі: Анастасія Маслоўская, загадчыца сектара навукова-даследчага аддзела бібліятэказнаўства, падрабязна раскрыла сучасны стан і перспектывы развіцця публічных бібліятэк рэспублікі; Наталля Замаева, загадчыца сектара навукова-даследчага аддзела бібліятэказнаўства, патлумачыла прававыя аспекты рэгулявання дзейнасці бібліятэк; Віктар Пшыбытка, начальнік цэнтра алічбоўкі і забеспячэння захаванасці бібліятэчных дакументаў, закрануў прававыя і тэхналагічныя аспекты стварэння электроннай бібліятэкі, а таксама магчымасці выкарыстання інфармацыйных рэсурсаў віртуальнай чытальнай залы Нацыянальнай бібліятэкі Беларусі; Вольга Какшынская, галоўны бібліятэкар навукова-даследчага аддзела бібліятэказнаўства, прадставіла праектныя інавацыі ў галіне краязнаўства на прыкладзе бібліятэк – пераможніц рэспубліканскага конкурсу “Бібліятэка – асяродак нацыянальнай культуры”.
Непадробную цікавасць у бібліятэчных спецыялістаў выклікала экскурсія ў музей кнігі, падчас якой калегі даведаліся пра шматвяковыя традыцыі беларускага кнігадрукавання ў кантэксце сусветнай гісторыі кнігі, азнаёміліся з лепшымі ўзорамі друкаванай справы, выдадзенымі на працягу стагоддзяў у розных кутках свету.
Матэрыял пададзены навукова-даследчым аддзелам бібліятэказнаўства.