17 снежня пры падтрымцы Генеральнага консульства Рэспублікі Беларусь у Стамбуле адбылася сустрэча дырэктара Нацыянальнай бібліятэкі Беларусі Рамана Матульскага з Махмутам Акам, рэктарам найстарэйшага ў Турцыі Стамбульскага ўніверсітэта, заснаванага ў 1453 годзе.
Бакі абмеркавалі магчымасці супрацоўніцтва ў адукацыйнай сферы і правядзення сумесных праектаў.
Раман Сцяпанавіч перадаў у дар універсітэту факсімільнае выданне “Буквар”, а таксама копію фрагмента татарскага кітаба з фондаў Нацыянальнай бібліятэкі Беларусі.
З мэтай развіцця далейшага ўзаемадзеяння быў падпісаны Пратакол аб супрацоўніцтве паміж Стамбульскім універсітэтам і “алмазам ведаў”.
На сустрэчы з дырэктарам бібліятэкі Стамбульскага ўніверсітэта, доктарам Первін Безірджы бакі абмеркавалі перспектывы супрацоўніцтва і дамовіліся садзейнічаць сумесным даследчым праектам, арганізоўваць узаемныя візіты, канферэнцыі, семінары, майстар-класы і выстаўкі, абменьвацца навуковымі дакументамі.
З’яўленне бібліятэкі Стамбульскага ўніверсітэта адносяць да сярэдзіны XV стагоддзя, часу яго заснавання султанам Фаціхам Мехметам. Бібліятэка валодае шматтысячнай калекцыяй рукапісаў Сярэднявечча. Толькі ў калекцыі рэдкіх кніг і старадрукаў знаходзіцца каля 65 тысяч найменняў на турэцкай, арабскай мовах, фарсі, латыні і інш.
На 18 снежня запланаваны візіт дырэктара Нацыянальнай бібліятэкі Беларусі ў Прэзідэнцкую і Нацыянальную бібліятэкі Турцыі.
Матэрыял прадастаўлены аддзелам сувязей з грамадскасцю.
