Кожны год аграрыі ўсяго свету спадзяюцца, што вынікі ўборачнай кампаніі можна будзе выказаць гэтымі яркімі словамі Міхася Міхайлавіча Пянкрата на адным з агітацыйных плакатаў Саюза мастакоў БССР.
Сёлета споўнілася 100 гадоў з дня нараджэння гэтага выдатнага беларускага паэта і празаіка.
На пачатковым этапе творчага шляху М. Пянкрату былі ўласцівы пераважна лірычныя вершы, у якіх значнае месца займала тэма кахання, але ў далейшым пісьменнік рэалізаваў сябе як сатырык.
Многія яго працы публікаваліся ў газетах “Чырвоная змена”, “Літаратура і мастацтва”, “Піянер Беларусі”, “Комсомольская правда”, у часопісах “Полымя”, “Смена”, “Крокодил”.
Асобныя творы аўтара перакладзены на рускую, украінскую, грузінскую, літоўскую, эстонскую і іншыя мовы.
Гумарыстычныя зборнікі “Палын і кветкі” (1958), “Не з таго канца” (1959), “Аўтарытэт на колах” (1968) і іншыя творы М. Пянкрата захоўваюцца ў Нацыянальнай бібліятэцы Беларусі. Тут жа можна знайсці і сатырычныя плакаты з серыі “Агітплакат Саюза мастакоў БССР”, тэксты да якіх напісаў Міхась Міхайлавіч.
Гэтыя і многія іншыя плакаты з фондаў Нацыянальнай бібліятэкі Беларусі пераведзены ў лічбавы фармат. Усяго ў электроннай бібліятэцы выстаўлена больш за 5 000 плакатаў рознай тэматыкі, з іх больш за 350 – з серыі “Агітплакат Саюза мастакоў БССР”.
