Падведзены вынікі конкурсу творчых фотаработ “Мая кніга для ўсяго свету”, прымеркаванага да 500-годдзя беларускага і ўсходнеславянскага кнігадрукавання, якое адзначаецца сёлета.
На конкурс, абвешчаны радыё “Беларусь” Белтэлерадыёкампаніі, паступіла больш за 100 фотаздымкаў з 11 краін Еўропы, Азіі і Афрыкі. Сваёй улюбёнай кнігай з усім светам падзяліліся слухачы радыё з Расіі, Германіі, Кітая, Латвіі, Індыі, Егіпта, В’етнама, Польшчы, Інданезіі, Бангладэш, а таксама з самой Беларусі. Прычым большасць дасланых фотаздымкаў суправаджаліся тэкставымі каментарыямі, што таксама ўлічвала журы.
Пры вызначэнні пераможцаў члены журы кіравалася вынікамі інтэрнэт-галасавання ў спецыяльным раздзеле на сайце радыё “Беларусь”. Усяго ў 12 турах конкурсу прагаласавала больш за 60 тысяч карыстальнікаў.
Галасы размясціліся наступным чынам:
- Яраслаў Янджэйчак (Польшча) – 1 месца (7 583 галасы),
- Бернд Зайзер (Германія) – 2 месца (7 035 галасоў),
- Дзітмар Вольф (Германія) – 3 месца (3 470 галасоў).
Як адзначыў галоўны дырэктар радыё “Беларусь” Навум Гальпяровіч, замежныя слухачы сваім удзелам у конкурсе паказалі цікавасць да кнігі ў розных кутках нашай планеты, даведаліся пра мерапрыемствы, якія адбыліся з нагоды святкавання 500-годдзя беларускага і ўсходнеславянскага кнігадрукавання. Многія ўдзельнікі конкурсу ў каментарыях да фотаработ дзяліліся гісторыяй і традыцыямі кнігадрукавання ў сваіх краінах, дзякавалі за магчымасць распавесці свету пра свае любімыя кнігі.
Прызы для пераможцаў прадастаўлены Нацыянальнай бібліятэкай Беларусі, якая сёлета святкуе сваё 95-годдзе. Як падкрэсліў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці, культуролаг, літаратуразнаўца Алесь Суша, конкурс творчых фотаработ “Мая кніга для ўсяго свету” – добрая магчымасць убачыць разнастайнасць сусветнай літаратурнай палітры, а пераможцы будуць узнагароджаны факсімільным выданнем самага старажытнага на тэрыторыі Беларусі “Буквара” і сувенірнай прадукцыяй да 500-годдзя кнігадрукавання.
Акрамя таго, прызамі і прома-прадукцыяй ад радыё “Беларусь” адзначаны аўтары фотаработ, якія набралі найбольшую колькасць галасоў у кожным з тураў.
