У рамках работы па выяўленні і вяртанні нацыянальных культурных каштоўнасцей галоўнае кнігасховішча краіны папоўніцца ўнікальнай калекцыяй выданняў беларускага паэта, гісторыка літаратуры і перакладчыка Уладзіслава Сыракомлі.
Намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Алесь Суша даў каментарый падзеі: “Больш як паўгода мы праводзілі перамовы аб набыцці ўнікальнай калекцыі прыжыццёвых і пасмяротных выданняў (звыш 50 кніг) знакамітага беларускага і польскага пісьменніка. Была выканана экспертыза кожнай кнігі, правераны іх сапраўднасць і каштоўнасць. Скажу толькі, што ў гэтай калекцыі багата сапраўды надзвычай рэдкіх і каштоўных выданняў.
Адмыслова для перадачы ў фонды Нацыянальнай бібліятэкі ўнікальная калекцыя рарытэтаў была набыта ў прыватнага калекцыянера дзякуючы падтрымцы Ганаровага консула Беларусі ў Лазане Андрэя Нажэскіна і ўдзелу Часовага паверанага ў справах Рэспублікі Беларусь у Швейцарскай Канфедэрацыі Паўла Мацукевіча”.
З больш падрабязнай інфармацыяй можна азнаёміцца на афіцыйным сайце Пасольства Рэспублікі Беларусь у Швейцарскай Канфедэрацыі.
