12 красавіка ў Нясвіжскім палацавым ансамблі адкрылася выстаўка “Кніжная спадчына Радзівілаў”.
Праект арганізаваны сумесна Нацыянальным гісторыка-культурным музеем-запаведнікам “Нясвіж”, Нацыянальнай бібліятэкай Беларусі і Цэнтральнай навуковай бібліятэкай імя Якуба Коласа Нацыянальнай акадэміі навук Беларусі (ЦНБ НАН Беларусі).
Гісторыя фарміравання Нясвіжскай ардынацкай бібліятэкі бярэ пачатак з XVI ст. Сёння разрозненыя яе часткі знаходзяцца ў бібліятэках Расіі, Фінляндыі, Польшчы, Літвы і Беларусі.
Выстаўка знаёміць грамадскасць з цікавымі экзэмплярамі кніг са збору Радзівілаў Нясвіжскай ардынацыі, якія ў наш час захоўваюцца ў фондах Нацыянальнай бібліятэкі Беларусі, ЦНБ НАН Беларусі і з’яўляюцца састаўной часткай агульнаеўрапейскай культурнай спадчыны.
На мерапрыемстве выступілі дырэктар Нацыянальнага гісторыка-культурнага музея-запаведніка “Нясвіж” С.М. Клімаў, дырэктар Нацыянальнай бібліятэкі Беларусі Р.С. Матульскі, дырэктар ЦНБ НАН Беларусі Н.Ю. Бярозкіна, рэжысёр Нацыянальнага акадэмічнага Вялікага тэатра оперы і балета Рэспублікі Беларусь В.І. Скарабагатаў, старшыня Беларускага фонду культуры У.А. Гілеп.
У сваім выступленні Р.С. Матульскі падкрэсліў, што ў рамках рэалізацыі Дзяржаўнай праграмы “Культура Беларусі” на 2011–2015 гг. Нацыянальнай бібліятэкай Беларусі вядзецца актыўная работа па вывучэнні і віртуальнай рэканструкцыі ўнікальнага кніжнага збору Радзівілаў.
На цырымоніі адкрыцця выстаўкі загадчык аддзела рэдкіх кніг і рукапісаў ЦНБ НАН Беларусі А.В. Стэфановіч прэзентаваў каталог “Бібліятэка Радзівілаў Нясвіжскай ардынацыі”. Каталог уяўляе сабой поўнае апісанне выданняў XVII ст. з кніжных збораў Нясвіжскай ардынацыі князёў Радзівілаў з фондаў ЦНБ НАН Беларусі.