21 студзеня ў г. Колката (Калькута) адбыліся прэзентацыя і цырымонія перадачы ў дар факсімільнага выдання “Кніжная спадчына Францыска Скарыны” Нацыянальнай бібліятэцы Індыі.
У ходзе ўрачыстага мерапрыемства ў прысутнасці дыпламатычнага корпуса, грамадскіх колаў і СМІ Індыі ганаровы консул Беларусі ў г. Колката Сітарам Шарма ад імя беларускага боку перадаў факсімільнае выданне “Кніжная спадчына Францыска Скарыны” начальніку ўпраўлення бібліятэк Міністэрства культуры Індыі – генеральнаму дырэктару Нацыянальнай бібліятэкі Індыі Шравану Кумару.
Абодва бакі выказалі ўпэўненасць у тым, што дадзенае мерапрыемства пакладзе пачатак плённаму двухбаковаму супрацоўніцтву паміж бібліятэкамі Беларусі і Індыі.
Выхад у свет 21-томнага факсіміле “Кніжная спадчына Францыска Скарыны” з’яўляецца сапраўды вялікай падзеяй не толькі для Беларусі, але і ўсёй сусветнай супольнасці.
Міжнародны навуковы і выдавецкі праект, рэалізаваны Нацыянальнай бібліятэкай Беларусі і Банкам БелВЭБ, працягваўся пяць гадоў і быў паспяхова завершаны падчас святкавання 500-годдзя беларускага кнігадрукавання – у 2017 годзе. Сёння шматтомнае выданне працягвае папаўняць калекцыі найбуйнейшых бібліятэк свету і знаёміць жыхароў розных краін з багатай гісторыяй і самабытнай культурай Беларусі.
Матэрыял прадастаўлены аддзелам сувязей з грамадскасцю.