29 жніўня ў г. Рыа-дэ-Жанейра адбылася прэзентацыя і цырымонія перадачы ў дар факсімільнага выдання “Кніжная спадчына Францыска Скарыны” Нацыянальнай бібліятэкі Бразіліі.
Надзвычайны і Паўнамоцны Пасол Рэспублікі Беларусь у Федэратыўнай Рэспубліцы Бразілія Аляксандр Царкоўскі ўручыў шматтомнае факсіміле выконваючай абавязкі дырэктара бразільскай бібліятэкі Марыі Эдуардэ Маркеш.
Падчас урачыстага мерапрыемства для кіраўніцтва і супрацоўнікаў бразільскай бібліятэкі была праведзена прэзентацыя Нацыянальнай бібліятэкі Беларусі і прадэманстраваны відэафільм пра біяграфію беларускага першадрукара з субтытрамі на партугальскай мове. Кіраўнік беларускага дыппрадстаўніцтва выказаў упэўненасць у тым, што дадзенае мерапрыемства пакладзе пачатак плённаму двухбаковаму супрацоўніцтву паміж бібліятэкамі Беларусі і Бразіліі.
У сваю чаргу калектыў бразільскай бібліятэкі высока ацаніў дар і выказаў зацікаўленасць у сумесных праектах і абмене вопытам.
Выхад у свет 21-томнага факсіміле “Кніжная спадчына Францыска Скарыны” з’яўляецца сапраўды вялікай падзеяй не толькі для Беларусі, але і ўсёй сусветнай супольнасці.
Міжнародны навуковы і выдавецкі праект, рэалізаваны Нацыянальнай бібліятэкай Беларусі і Банкам БелВЭБ, доўжыўся пяць гадоў і быў паспяхова завершаны летась, падчас святкавання 500-годдзя беларускага кнігадрукавання. І сёння шматтомнае выданне папаўняе калекцыі найбуйнейшых бібліятэк свету і знаёміць жыхароў розных краін з багатай гісторыяй і самабытнай культурай Беларусі.