Менавіта ў Год культуры, напярэдадні святкавання 500-годдзя беларускага кнігадрукавання, кніжная спадчына Беларусі стала даступнай у глабальнай інфармацыйнай прасторы.
У Нацыянальнай бібліятэцы Беларусі стартаваў анлайн-праект “Кніга Беларусі XIV–XVIII стагоддзяў”, што ўключае дакументы, якія з’яўляюцца гістарычнай каштоўнасцю як для Беларусі, так і сусветнага супольніцтва ў цэлым.
Электронны рэсурс змяшчае копіі поўных тэкстаў выданняў з фондаў Нацыянальнай бібліятэкі Беларусі, якія выйшлі ў XIV–XVIII стагоддзях і па тэрытарыяльных, моўных, аўтарскіх або зместавых прыкметах адносяцца да Беларусі. У ім прадстаўлены старадрукаваныя кнігі кірылічнага друку, выданні на польскай, лацінскай і іншых мовах.
Праект будзе цікавы даследчыкам у галіне кнігазнаўства, гісторыі, педагогікі, супрацоўнікам бібліятэк, архіваў, музеяў, а таксама ўсім, хто цікавіцца гісторыяй і культурай Беларусі.
Кожная кніга мае апісанне, у якое ўключаны звесткі пра аўтара, месца, год, мову, прадметную галіну, да якой адносіцца змест дакумента, а таксама інфармацыю пра фізічныя характарыстыкі выдання.
Для зручнасці карыстальнікаў у апісанні дакумента прадстаўлены шыфр захоўвання арыгінала ў Нацыянальнай бібліятэцы Беларусі, выкарыстаўшы які можна ажыццявіць заказ для далейшай работы з ім у будынку бібліятэкі.
Выстаўкі, прадстаўленыя ў праекце, дазваляюць пазнаёміцца з найбольш значнымі ў гістарычным аспекце калекцыямі дакументаў. Напрыклад, асобна можна ўбачыць поўныя тэксты выданняў Францыска Скарыны, якія захоўваюцца ў фондах бібліятэкі.
Для зручнасці падбору кніг, надрукаваных у пэўным месцы, рэсурс мае карту, дзе нанесены адпаведныя геаграфічныя аб’екты.
Акрамя таго, у рэсурсе прадугледжана магчымасць ажыццяўлення шматаспектнага пошуку неабходных дакументаў па назве, аўтары (стваральніку), месцы выдання, прадметнай рубрыцы і г.д.
“Кніга Беларусі XIV–XVIII стагоддзяў” даступная анлайн зусім нядаўна – з кастрычніка 2016 года. За гэты нядоўгі тэрмін рэсурс наведалі жыхары не толькі Беларусі, але і Вялікабрытаніі, Германіі, Літвы, Польшчы, Расіі, Украіны і шэрагу іншых краін, што з’яўляецца сведчаннем высокай цікавасці да беларускай культуры ва ўсім свеце.
Праект пастаянна развіваецца. У перспектыве ў яго будуць уключаны копіі дакументаў з фондаў не толькі Нацыянальнай бібліятэкі Беларусі, але і іншых бібліятэк, у тым ліку замежных, з тым, кааб гэты рэсурс у поўным аб’ёме прадставіў кніжную спадчыну Беларусі ў глабальным Сеціве. Сімвалічна, што менавіта ў Год культуры да шэрагу яркіх падзей, якія ўжо адбыліся, дабавілася яшчэ адна вельмі значная – беларуская кніжная культура стала даступнай у сусветнай інфармацыйнай прасторы.