Да XXIII Дня беларускага пісьменства Нацыянальная бібліятэка і выдавецтва “Беларуская энцыклапедыя імя П. Броўкі” падрыхтавалі трэці том беларускай дзіцячай энцыклапедыі “Францыск Скарына”.
Жыхары і госці свята ў Рагачове першымі ўбачылі кнігу, прысвечаную кніжнай спадчыне першадрукара. Том “Францыск Скарына – чалавек-легенда” быў прэзентаваны 4 верасня на пляцоўцы Фестывалю кнігі і прэсы. У прэзентацыі прынялі ўдзел галоўны рэдактар выдавецтва “Беларуская энцыклапедыя імя П. Броўкі” Ларыса Языковіч і аўтар кнігі – намеснік дырэктара Нацыянальнай бібліятэкі Беларусі Аляксандр Суша.
Першая дзіцячая энцыклапедыя “Францыск Скарына” ўключае тры тамы: “Францыск Скарына – чалавек-энцыклапедыя”, “Францыск Скарына – чалавек свету”, “Францыск Скарына – чалавек-легенда”. Трэці том прадстаўляе выданні Скарыны ў шырокім гісторыка-культурным кантэксце і змяшчае раздзелы, прысвечаныя рукапіснай кнізе, узнікненню кнігадрукавання ў Еўропе і яго заснавальніку Іагану Гутэнбергу, а таксама першым еўрапейскім друкаваным кнігам. У раздзеле “Выданні асветніка” падрабязна даецца аналіз пражскіх і віленскіх выданняў Скарыны. Раздзел, прысвечаны тэхналогіі стварэння кніг, распавядае пра паперу, друкарскі станок, шрыфты, гравюры, графічную арнаментыку, вокладкі выданняў Скарыны. Раздзел “Спадчына Скарыны” знаёміць з геаграфіяй распаўсюджання ў свеце кніг беларускага першадрукара.