14 снежня ў бібліятэцы адбыўся творчы вечар “Кнігі, кнігі – мае дарагія сябры…”, прысвечаны 500-годдзю беларускага кнігадрукавання.
У межах сустрэчы адбылося святочнае пасяджэнне клуба творчых жанчын “Спадарыня”, які аб’яднаў таленавітых жанчын, членаў дзвюх грамадскіх арганізацый – Мінскага гарадскога аддзялення Саюза пісьменнікаў Беларусі і Беларускага саюза жанчын.
Створаны ў 2015 годзе, клуб “Спадарыня” за час свайго існавання арганізаваў і правёў мноства творчых імпрэз, накіраваных на папулярызацыю беларускай літаратуры, культуры, мастацтва, народных рамёстваў. Пастаянныя актыўныя ўдзельнікі штомесяц праводзяць святочныя пасяджэнні – кожны раз цікавыя, з незвычайнай тэмай і ідэяй.
Гэтым разам імпрэзу прысвяцілі галоўнай тэме 2017 года – 500-годдзю беларускага кнігадрукавання. У мерапрыемстве прынялі ўдзел літаратары Міхась Пазнякоў, Навум Гальпяровіч, Анатоль Аўруцін, Аляксандр Вашчанка. Таксама сваю творчасць прадставілі Тамара Кавалёнак, Алена Шчарбакова, Валянціна Паліканіна, Лізавета Палеес, Вольга Шпакевіч, Іна Фралова, Таццяна Жылінская, Алена Міхаленка і іншыя члены клуба.
Сапраўдным падарункам для ўдзельнікаў мерапрыемства стала знаёмства з унікальнымі экспанатамі міжнароднай выстаўкі “Францыск Скарына і яго эпоха”, падчас наведвання якой госці змаглі дакрануцца да сусветнай кніжнай спадчыны.