7 лютага ў 15.10 адбудзецца кірмаш інвестыцыйных праектаў Нацыянальнай бібліятэкі Беларусі, які ўключае прэзентацыю ўнікальных факсімільных выданняў і анонс перспектыў факсімільнага аднаўлення кніжных помнікаў Беларусі.
Мерапрыемства пройдзе на Нацыянальным стэндзе Беларусі ў рамках ХХ Мінскай міжнароднай кніжнай выстаўкі-кірмашу “Кнігі Беларусі – 2013”.
Будуць прадстаўлены праекты, рэалізаваныя Нацыянальнай бібліятэкай Беларусі ў 2012 г.:
- “Букварь языка славянского” (Вільня, 1767) – сумесна з прадстаўніцтвам XEROX у Рэспубліцы Беларусь;
- “Сымон-музыка” (1925) Я. Коласа – сумесна з выдавецтвам “Мастацкая літаратура”;
- “Шляхам жыцця” (1913) Я. Купалы – сумесна з выдавецтвам "Мастацкая літаратура";
- “Гісторыя беларускай (крыўскай) кнігі” (1926) В. Ластоўскага – сумесна з выдавецтвам “Мастацкая літаратура”;
- “Калядная пісанка” (1913) – сумесна з ААТ “Банк БелВЭБ”;
- “Жыццё Еўфрасінні Полацкай” (XV–XVI стст.) – сумесна з Выдавецтвам Беларускага экзархата;
- “Полацкае Евангелле” (XII ст.) – сумесна з Выдавецтвам Беларускага экзархата.
У 2012 г. пры ўдзеле Нацыянальнай бібліятэкі Беларусі была выпушчана выключна вялікая колькасць факсімільных выданняў, што стала адной з прычын прысуджэння калектыву Нацыянальнай бібліятэкі Беларусі спецыяльнай прэміі Прэзідэнта Рэспублікі Беларусь дзеячам культуры і мастацтва.
У той жа час спецыялістамі бібліятэкі распрацаваны Рэестр інвестыцыйных праектаў па факсімільным выданні помнікаў кніжнай культуры Беларусі, які дазваляе працягнуць гэтую працу ў далейшым. Уводзіны ў шырокае навуковае і грамадскае абарачэнне найбольш яркіх помнікаў кніжнай культуры Беларусі пры дапамозе іх факсімільнага перавыдання дазволіць вырашыць шматлікія задачы, звязаныя з прапагандай нацыянальнай кніжнай спадчыны, актывізацыяй кнігазнаўчых даследаванняў у краіне, забеспячэннем захаванасці арыгіналаў пасродкам арганізацыі доступу да іх высакаякасных копій.
Рэалізацыя падобных ініцыятыў пры падтрымцы партнёраў бібліятэкі з'яўляецца формай інвеставання ў фарміраванні іх пазітыўнага іміджу. Яна сведчыць аб іх імкненні да захавання і папулярызацыі культурнай спадчыны Беларусі.